নিয়মীয়া বাৰ্তা, ২ নবেম্বৰঃ লখিমপুৰ জিলাৰ ধলপুৰ আৰক্ষী চকীৰ অন্তৰ্গত গনকদলনিত দিনদুপৰতে তিনিঘৰ লোকৰ ঘৰত চুৰিকাণ্ড সংঘটিত হয়। গনকদলনিৰ নিবাসী গিৰীন্দ্ৰ গগৈ,দীপক গগৈ আৰু পেটুৱা গোঁসাঞি থানৰ সমিপৰ নিবাসী প্ৰৱক্তা ডিম্ব দত্তৰ ঘৰত এই চুৰিকাৰ্য সংঘটিত হয় ৷
কালি দিনদুপৰতে সংঘটিত চুৰিৰ সন্দৰ্ভত ধলপুৰ আৰক্ষী চকীত গিৰীন্দ্ৰ গগৈ আৰু ডিম্ব দত্তই নিপন গগৈ নামৰ এজনৰ ওপৰত সন্দেহ প্ৰকাশ কৰি এজাহাৰ দাখিল কৰে ৷ ইতিমধ্যে ধলপুৰ আৰক্ষীয়ে নিপন গগৈক আটক কৰি সোধাপোচা কৰাত চুৰি কাৰ্য কথা অবগত কৰে ৷
প্ৰাপ্ত তথ্য অনুসৰি গিৰীন্দ্ৰ গগৈৰ ঘৰৰ ভিতৰত চোৰ প্ৰবেশ কৰি লোহাৰৰ আলমিৰাৰ পৰা নগদ ১০ হাজাৰ টকা,এযোৰ সোণৰ ফুলি,সোণৰ আঙুঠি তিনিটা,নেকলেচ এডাল,পাটৰ কাপোৰ দুযোৰ আৰু চাৰি যোৰ মূগাকাপোৰ চোৰে লৈ যায় ৷ একেদৰে দীপক গগৈৰ ঘৰৰ গডেছৰ পৰা নগদ ৫ হাজাৰ টকা আৰু কেইবাযোৰো কাঁহৰ কাঁহী বাটি চুৰি কৰে ৷
আনফালে সেই একে দিনাই প্ৰৱক্তা ডিম্ব দত্তৰ ঘৰৰ পৰা ৫ হাজাৰতকৈ অধিক টকা, এযোৰ সোণৰ ফুলি, এযোৰ সোণৰ খাৰু আৰু দুটা সোণৰ আঙুঠি চোৰে লৈ যোৱা বুলি জানিবলৈ দিয়ে ৷ ধলপুৰ আৰক্ষীয়ে চুৰি কাৰ্য সংঘটিত কৰা অভিযোগত নিপন গগৈ নামৰ যুৱক এজনক আটক কৰি সোধাপোচা কৰাত চুৰি কৰা কথা স্বীকাৰ কৰিছে আৰু গুণ দুৱৰা নামৰ আন এটাও এই কামত জড়িত বুলি জানিবলৈ দিয়ে ৷
Input: মাধূৰ্য দাস,ধলপুৰ