নিয়মীয়া বাৰ্তা , ২৪ মাৰ্চ: ৰঙিয়াত আজি হঠাতে অহা প্ৰচণ্ড ধুমুহাই বিস্তৰ ক্ষতিসাধন কৰে । ৰঙিয়া নগৰৰ লগতে ইয়াৰ পাৰ্শ্বৱৰ্তী অঞ্চলসমূহত বলা এই ধুমুহাজাকত বহু লোকৰ ঘৰ-দুৱাৰ , গছ-গছনি ভাঙি যায় । আনকি ধুমুহাৰ সময়ছোৱাত স্তব্ধ হৈ পৰে যাতায়াত ব্যৱস্থা । শ’লমাৰীত এখন টেম্প’ৰ ওপৰতে বাগৰি পৰে এডাল প্ৰকাণ্ড গছ । কোনোমতে চালকৰ প্ৰাণ ৰক্ষা পৰে । ইয়াৰ উপৰিও বহু কেইখন বিদ্যালয়ৰ টিনপাত উৰুৱাই নিয়াৰ লগতে বেৰ ভাঙি যায় । ইফালে বিদ্যুতৰ খুঁটা উভালি পৰাৰ বাবে বহু অঞ্চলত বিদ্যুৎ সেৱা ব্যাহত হৈ পৰে।
প্ৰেৰকঃ ফাৰুক হুছেইন , ৰঙিয়া