নিয়মীয়া বাৰ্তা, ৬ ছেপ্টেম্বৰঃ বাক্সা জিলাৰ বাগানপাৰা থানাৰ অন্তর্গত ৰৌমাৰীত দেওবাৰে পুৱা ৰহস্যজনকভাৱে উদ্ধাৰ হয় এখন মালভর্তি ট্ৰাক৷ গুৱাহাটীৰ লখৰাৰ পৰা যোৱা ২ ছেপ্টেম্বৰতে ইম্ফললৈ এ এছ–২৫ ই চি–১১৭৫ নম্বৰৰ বাৰ চকীয়া ট্ৰাকখনেৰে গেলামালৰ সামগ্রী লৈ যোৱাৰ কথা আছিল৷
কিন্তু আশ্চর্যজনকভাৱে চালকে উক্ত ট্ৰাকখন গুৱাহাটীৰ পৰা বাক্সা জিলালৈ লৈ আহে৷ দেওবাৰে পুৱা বাক্সা জিলাৰ ৰৌমাৰীত গাডীখন দেখি ৰাইজে সন্দেহবশতঃ আবদ্ধ কৰি ৰাখে৷ আৰু লগে লগে বৰবৰী আৰক্ষী খবৰ দিয়ে ৰৌমাৰীৰ স্থানীয় লোকে৷ পিছত আৰক্ষীয়ে ঘটনাস্থলীত উপস্থিত হৈ ট্ৰাকখনৰ চালকসহ তিনিজনক আটক কৰে৷
সাংবাদিকক চালকজনে জানিবলৈ দিয়া অনুসৰি তেওঁলোকে কিছু কিছু ঠাইত গাডীত অনা গেলামালৰ সামগ্রী বিক্রী কৰি আহিছিল আৰু বাক্সাৰ ৰৌমাৰীতো এইদৰে সামগ্রী বিক্রী কৰিবলৈ আহি আবদ্ধ হৈ পৰে তেওঁলোক৷ ঘটনা সন্দর্ভত বৰবৰী আৰক্ষীয়ে তদন্ত আৰম্ভ অব্যাহত ৰাখিছে৷