নিয়মীয়া বাৰ্তা, ৩ ছেপ্টেম্বৰঃ আগন্তুক বিধানসভা নিৰ্বাচনৰ দিন চমু চাপি অহাৰ লগে লগে নগাঁও জিলাৰ চামগুৰিত বিজেপি দলে নিৰ্বাচনৰ কুচকাৱাজ আৰম্ভ কৰিছে ৷ বিশেষকৈ চামগুৰি সমষ্টিৰ বাজিয়াগাঁও মণ্ডল বিজেপিৰ নৱনিৰ্বাচিত সভাপতি প্ৰাণজিৎ বৰাক আজি বাজিয়াগাঁও উন্নয়ন খণ্ডৰ প্ৰেক্ষাগৃহত অনুষ্ঠিত হোৱা এখন সভাত দলীয় কৰ্মীসকলে সম্বৰ্ধনা জনায়৷ উক্ত সভাখনত বাজিয়াগাঁও মণ্ডল বিজেপিৰ নৱনিৰ্বাচিত সভাপতি প্ৰাণজিৎ বৰাই আগন্তুক বিধানসভা নিৰ্বাচনত চামগুৰি সমষ্টিত বিজেপি দল আৰু অধিক শক্তিশালী কৰিবৰ বাবে প্ৰতিজন বিজেপি দলৰ কৰ্মীসকলৰ সহযোগ কামনা কৰাৰ লগতে প্ৰতিজন দলৰ কৰ্মীয়ে নিজৰ নিজৰ অঞ্চলত দলৰ সাংগঠনিক দিশ সৱল কৰিবলৈ আহ্বান জনায়৷
ভেলেউগুৰি গাঁও পঞ্চায়তৰ আঞ্চলিক সদস্য পিন্টু ডেকাই আঁত ধৰা উক্ত সভাখনত ভেলেউগুৰি গাঁও পঞ্চায়তৰ সভানেত্ৰী নিৰমাই দাস, সুতাৰগাঁও পঞ্চায়ত সভানেত্ৰী প্ৰণীতা দাধৰা, বিজেপি নেতা প্ৰণৱ দাসকে ধৰি প্ৰতিখন গাঁও পঞ্চায়তৰ সভাপতি আৰু বুথ কমিটিৰ বিষয়ববীয়াসকল উপস্থিত থাকে ৷ বাজিয়াগাঁও মণ্ডল বিজেপিৰ বুথ সমিতি আৰু শক্তি কেন্দ্ৰৰ আহ্বায়কসকলৰ উদ্যোগত অনুষ্ঠিত হোৱা সভাখনলৈ বাজিয়াগাঁও মণ্ডল বিজেপিৰ নৱনিৰ্বাচিত সভাপতি প্ৰাণজিৎ বৰাই দলিয় কৰ্মীসকলৰ লগত বাজিয়াগাঁও তিনিআলিৰ পৰা পদযাত্ৰা কৰি সভাগৃহত উপস্থিত হয়।
আনহাতে আজি বিয়লি সুতাৰগাঁও পঞ্চায়তৰ অন্তৰ্গত ভীমৰগাঁওস্থিত ১৩ নং মিকিৰহাট প্ৰাথমিক বিদ্যালয়ত বিজেপি দলৰ এখন সভা অনুষ্ঠিত হয় ৷ সুতাৰগাঁও পঞ্চায়তৰ সভানেত্ৰী প্ৰণীতা দাধৰাৰ সভাপতিত্বত অনুষ্ঠিত হোৱা উক্ত সভাখনত বাজিয়াগাঁও মণ্ডল বিজেপিৰ নৱনিৰ্বাচিত সভাপতি প্ৰাণজিৎ বৰাৰ উপস্থিতিত কংগ্ৰেছৰ প্ৰাক্তন আঞ্চলিক সদস্য হৰেন বৰাসহ প্ৰায় অৰ্ধশতাধিক কংগ্ৰেছ কৰ্মীয়ে বিজেপি দলত যোগদান কৰে ৷
আহ্বায়ক শক্তি কেন্দ্ৰৰ ভৱানন্দ দাসে আঁত ধৰা উক্ত সভাখনত বাজিয়াগাঁও মণ্ডল বিজেপিৰ সভাপতি প্ৰাণজিৎ বৰাই কলিয়াবৰ জিলা বিজেপিৰ সভাপতি অনিল শইকীয়াৰ নেতৃত্বত চামগুৰি সমষ্টিত দলৰ সাংগঠনিক দিশ সবল কৰিবলৈ উপস্থিত ৰাইজক আহ্বান জনায় ৷ উক্ত সভাখনত সুতাৰগাঁও পঞ্চায়তৰ আঞ্চলিক সদস্য প্ৰভাত দাস, বিজেপি নেতা নিৰ দাধৰা, ভানু দাস, ববী বৰাকে ধৰি বহুকেইজন নেতা উপস্থিত থাকে ৷