নিয়মীয়া বাৰ্তা, ১১মাৰ্চঃ নিবনুৱা সমস্যাৰ সমাধান, পলিয়েষ্টাৰ উদ্যোগ প্ৰাগ বছমি ছিন্থেটিকছ লিমিটেড পুনৰুজ্জীৱীত কৰাৰ লগতে কুৰুৱা-গুৱাহাটী সংযোগী ব্ৰহ্মপুত্ৰৰ ওপৰৰ দলং নিৰ্মাণক মূল ইছ্যু হিচাপে লোৱাৰ প্ৰতিশ্ৰুতি ৰাখিছে ছিপাঝাৰৰ ভাৰতীয় জাতীয় কংগ্ৰেছ দলৰ মনোনীত প্ৰাৰ্থী কুলদীপ বৰুৱাই।
যোৱা নিশা আনুষ্ঠানিকভাৱে দলীয় টিকট লাভ কৰাৰ পিছত সহস্ৰাধিক দলীয় কৰ্মী আৰু সমৰ্থকে সমষ্টিটোৰ কুৰুৱা-লেঙাৰ পৰা আদৰি আনে।বিয়লিৰ ভাগত ঐতিহাসিক নাৰিকলি শিৱমন্দিৰত আশিস লোৱাৰ পিছত সন্ধিয়া আহি উপস্থিত হয় ছিপাঝাৰৰ দুৱাহাটী শালৈপাৰাৰ স্বগৃহত।
আনহাতে যাত্ৰাপথত বিভিন্ন অনুষ্ঠান-প্ৰতিষ্ঠান আৰু দল সংগঠনে উষ্ম অভিনন্দন জ্ঞাপন কৰে প্ৰাৰ্থী কুলদীপ বৰুৱাক। কুলদ্বীপ বৰুৱাক এইবাৰ প্ৰাৰ্থী হিচাপে লাভ কৰি যথেষ্ট উৎসাহী হৈ পৰিছে ছিপাঝাৰৰ কংগ্ৰেছ শিবিৰ।
এইবাৰৰ নিৰ্বাচনত সম্পূৰ্ণ নতুন মুখৰ প্ৰাৰ্থী হিচাপে আত্মপ্ৰকাশ কৰা কুলদীপ বৰুৱাই দলীয় প্ৰাৰ্থিত্ব প্ৰদানৰ বাবে নেতৃত্বৰ প্ৰতি কৃতজ্ঞতা জ্ঞাপন কৰে আৰু ভাৰতীয় জনতা পাৰ্টীৰ পৰিৱৰ্তে এইবাৰ ছিপাঝাৰৰ ৰাইজে কংগ্ৰেছৰ সপক্ষে ভোটদান কৰিব বুলি আশা কৰে।