নিয়মীয়া বাৰ্তা, ১১ মাৰ্চঃ আগন্তুক বিধানসভা নিৰ্বাচনৰ দ্বিতীয় পৰ্যায়ৰ নিৰ্বাচনৰ বাবে আজি বিশাল সমদলেৰে ৰহা সমষ্টিৰ ভাৰতীয় জাতীয় কংগ্ৰেছৰ প্ৰাৰ্থী শশীকান্ত দাসৰ মনোনয়নৰ ৰেলীয়ে বিজেপি মিত্ৰদলক তীব্ৰ প্ৰত্যাহ্বান জনায়।
সহস্ৰাধিক দলীয় সমৰ্থকসহ কংগ্ৰেছৰ প্ৰাৰ্থীগৰাকীয়ে ৰহাৰ ডিমৌৰ নিজা বাসগৃহৰ পৰা সমদল কৰি নগাঁও উপায়ুক্ত কাৰ্যালয়ত মনোনয়ন দাখিল কৰিবলৈ যাত্ৰা কৰে। কিন্তু এই মনোনয়নৰ বাবে অহা সমৰ্থকৰ যান-বাহনে ডিমৌ চাৰিআলিত চাৰি শাখাযুক্ত ৰাষ্ট্ৰীয় পথত ব্যাপক যান-জঁটৰ সৃষ্টি কৰে।
যোৱা নিশা প্ৰাৰ্থী তালিকা ঘোষণাৰ পাছতে কংগ্ৰেছৰ নেতা কৰ্মী-সকলে প্ৰাৰ্থীগৰাকীৰ ঘৰলৈ গৈ দলে দলে আহি সমদলত অংশগ্ৰহণ কৰে। উল্লেখ্য যে কালি অগপ প্ৰাৰ্থী বিষ্ণু দাসে প্ৰায় দুই সহস্ৰাধিক দলীয় কৰ্মীক লগত লৈ মনোনয়ন পত্ৰ দাখিল কৰিছিল যদিও কংগ্ৰেছ দলে আজি অগপ-বিজেপি মিত্ৰজোঁটক প্ৰত্যাহ্বান জনাই প্ৰায় তিনি সহস্ৰাধিক দলীয় কৰ্মীক লগত লৈ মনোনয়ন পত্ৰ দাখিল কৰে।