নিয়মীয়া বাৰ্তা, ২৩ আগষ্ট: ৰাজ্যৰ শিক্ষানুষ্ঠানসমূহ পুনৰ খোলা সন্দর্ভত সৃষ্টি হোৱা অনিশ্চয়তাৰ মাজতে শনিবাৰে এক গুৰুত্বপূর্ণ ঘোষণা কৰিছে শিক্ষামন্ত্রী ড০ হিমন্ত বিশ্ব শর্মাই৷ টাস্ক ফ’র্চে ২৫ আৰু ২৬ আগষ্টত বৈঠকত মিলিত হোৱাৰ পিছতহে স্কুল খোলা সন্দর্ভত চূড়ান্ত সিদ্ধান্ত লোৱা হ’ব বুলি মন্ত্রীগৰাকীয়ে সদৰী কৰিছে৷
আমিনগাঁৱত এক অনুষ্ঠানত অংশগ্রহণৰ অন্তত সংবাদ মাধ্যমৰ আগত তেওঁ কয়– ‘১ ছেপ্টেম্বৰৰ পৰা স্কুল খুলিবলৈ আমি সাজু হৈ আছোঁ৷ শিক্ষকসকলেও ক’ৰোনাৰ পৰীক্ষা আৰম্ভ কৰিছে৷ কিন্তু এইক্ষেত্রত ৰাইজৰো বিভিন্ন মতামত আহিছে৷ সেয়েহে ৰাইজৰ এই মতামতসমূহ অহা ২৫ আৰু ২৬ আগষ্টত টাস্ক ফ’র্চে আলোচনা কৰিব৷ তাৰ পিছতহে আমি চূড়ান্ত সিদ্ধান্ত ল’ম৷ টাস্ক ফ’র্চে যি সিদ্ধান্ত ল’ব, মই মন্ত্রী হিচাপে সেই সিদ্ধান্তই মানি ল’ব লাগিব৷ টাস্ক ফ’চত অসমৰ শিক্ষাবিদ আৰু শিক্ষক সন্মিলনীসমূহৰ প্রতিনিধি আছে৷ তেওঁলোকে আলোচনা কৰি সিদ্ধান্ত গ্রহণ কৰিব৷’
ইপিনে মন্ত্রীগৰাকীয়ে সকলো শিক্ষককে ক’ৰোনা পৰীক্ষা সম্পন্ন কৰি সাজু হৈ থাকিবলৈ আহ্বান জনাইছে৷ এই প্রসংগত তেওঁ কয় যে সকলো অধ্যাপক–অধ্যাপিকা, শিক্ষক–শিক্ষয়িত্রীক ক’ৰোনা পৰীক্ষা কৰি কর্তব্যত যোগদান কৰিবলৈ সাজু হৈ থাকিবলৈ আহ্বান জনাইছোঁ৷ লগতে ১ ছেপ্টেম্বৰত গন্তব্য স্থানলৈ যাবলৈ শিক্ষকসকলক সাজু হৈ থাকিবলৈও তেওঁ আহ্বান জনায়৷