নিয়মীয়া বাৰ্তা, ৩ জানুৱাৰীঃ কামৰূপ জিলাৰ ছয়গাঁৱৰ মাজ মজিয়াত অৱস্থিত গিয়াছ ক্লথ ষ্টোৰৰ গিয়াছ মাৰ্ট নামৰ বৃহৎ কাপোৰৰ দোকানখনত নিশা এক অগ্নিকাণ্ড সংঘটিত হয় ৷ নিশা প্ৰায় ১০ বজাত এই অগ্নিকাণ্ড সংঘটিত হয়।
ছয়গাঁৱৰ মাজমজিয়াত অৱস্থিত এই বৃহৎ মাৰ্টখনত সংঘটিত বিধ্বংসী অগ্নিকাণ্ডৰ ফলত কেইবালাখ টকাৰ বিভিন্ন ধৰণৰ কাপোৰ ভস্মীভূত হয় ৷ কাপোৰৰ দোকানখনত জুই লগাৰ পিচতেই অগ্নিনিৰ্বাপক বাহিনীৰ গাড়ী উপস্থিত হয় জুই নিৰ্বাপণ কৰিবলৈ সক্ষম হয় যদিও ইতিমধ্যে দোকানত থকা কাপোৰ সমূহ ভস্মীভূত হয় ৷
ঘটনাস্থলীত ছয়গাঁও আৰক্ষীৰ দলো উপস্থিত হয় ৷ আনহাতে শ্বৰ্ট চাৰ্কিটৰ ফলতেই এই বৃহৎ কাপোৰৰ দোকানখনত অগ্নি সংযোগ হোৱা বুলি সন্দেহ কৰা হৈছে ৷