নিয়মীয়া বাৰ্তা, ৮ ছেপ্টেম্বৰঃ তিনিচুকীয়া জিলাৰ মাৰ্ঘেৰিটা থানাৰ অন্তৰ্গত বৰগোলাই বাঁহবাৰীৰ সমীপত আজি সন্ধিয়া প্ৰায় ৭-৩৫ বজাত সংঘটিত হোৱা এক ভয়ংকৰ পথ দুৰ্ঘটনাত এগৰাকী মহিলা ঠাইতে নিহত হয়। জানিব পৰা মতে, জাগুনৰ দিশৰ পৰা কেঁচা চাহপাত কঢ়িয়াই অনা এ এছ ২৩ চিচি ৪২৫৩ নম্বৰৰ এখন তীব্ৰ বেগী বলেৰ’ পিকআপ ভানে বিপৰীত দিশৰ পৰা যোৱা ফুলমায়া প্ৰহৰী (৪৩) নামৰ এগৰাকী মহিলাক প্ৰচণ্ড জোৰেৰে খুন্দা মৰাৰ ফলত মহিলা গৰাকীৰ ঠাইতে নিহত হয়। দুৰ্ঘটনা সংঘটিত কৰিয়েই চাহপাত বোজাই কৰা গাড়ীখন পলাই গৈ বৰগোলাইস্থিত গ্ৰীনগ’ল্ড চাহ ফেক্টৰীত সোমোৱাৰ চেষ্টা কৰিছিল যদিও গাড়ীখনক পিছে পিছে খেদি গৈ স্থানীয় লোকে জব্দ কৰি মাৰ্ঘেৰিটা আৰক্ষীক চমজাই দিয়ে।