বৰমাত দলীয় প্রার্থী প্রক্ষেপ নকৰিলে বিজেপি এৰাৰ হুংকাৰ নেতা–কর্মীৰ

নিয়মীয়া বাৰ্তা ৫ মাৰ্চঃ সমাগত বিধানসভা নির্বাচনৰ প্রার্থী তালিকাক লৈ ৰাইজৰ মাজত বৃদ্ধি হৈছে তীব্র উৎকণ্ঠা৷ এনে সময়তে ৬২নং বৰমা বিধানসভা সমষ্টিৰ মিত্রজোঁটৰ প্রার্থী কোন হ’ব, তাক লৈ গুণাগঁঠা চলি থকাৰ মাজতে বৰমা বিধানসভা সমষ্টিৰ বিজেপিৰ নেতৃত্ব আৰু সমর্থকে আজি এখন সংবাদ মেল আয়োজন কৰে৷ সংবাদ মেলত সাংসদ নৱ কুমাৰ শৰণীয়া মুর্দাবাদ, নৱ কুমাৰ শৰণীয়া গ’ বেক ধ্বনিৰে উত্তাল হৈ পৰে বৰমা মুছলপুৰ মণ্ডল সমিতিৰ বৰমাৰ কার্যালয়৷ সংবাদ মেলৰ মাজতে দলীয় কার্যকর্তাই দলীয় প্রার্থী প্রক্ষেপ নকৰিলে বিজেপি ত্যাগ কৰাৰো হুংকাৰ দিয়ে৷ সংবাদ মেলত বিজেপিৰ নেতৃবর্গই ৬২নং বৰমা বিধানসভা সমষ্টিটো কোনো মিত্রজেজাটৰ প্রার্থীক এৰি নিদিবলৈ বিজেপিৰ কেন্দ্রীয় নেতৃত্বক আহ্বান জনায়৷

বিজেপিৰ বেনাৰত যিগৰাকী প্রার্থীক দলৰ নীতি নির্ধাৰণ কমিটীয়ে নির্বাচিত কৰি প্রার্থী ঘোষণা কৰিব, তেওঁ জয়ী হোৱাটো নিশ্চিত বুলি মন্তব্য কৰে বিজেপিৰ বাক্সা জিলা সমিতিৰ সভাপতি ৰাম দাহালে৷ তৃতীয় পর্যায়ত অনুষ্ঠিত হ’ব লগা সমষ্টিটোৰ প্রার্থী বাছনিৰ ক্ষেত্রত বিজেপি দলৰ পৰা যিগৰাকী প্রার্থীক প্রক্ষেপ কৰিব, তেওঁৰ সমর্থনত সকলো বিজেপি নেতা–কর্মীয়ে সমর্থন দিব বুলি অংগীকাৰ কৰে৷ সংবাদ মেলত সদ্যসমাপ্ত বিটিচি পৰিষদীয় নির্বাচনৰ ভোট বিন্যাসৰ প্রতি লক্ষ্য ৰাখি সমষ্টিটোত মিত্রজোঁটক এৰি নিদিলে দল অধিক লাভান্বিত হ’ব বুলি মন্তব্য কৰে সভাপতিজনে৷ আনহাতে, সমষ্টিটোৰ সুসংগঠিত হৈ থকা বিজেপিৰ ভেটিত ব্যাঘাত জন্মাৰ আশংকা ব্যক্ত কৰে বিজেপিৰ নেতৃত্বই৷ বাক্সা জিলাৰ তামুলপুৰ, চাপাগুৰি আৰু বৰমা বিধানসভা সমষ্টি তিনিটাত বিজেপিৰ ভেটি অধিক শক্তিশালী বুলি মন্তব্য কৰি সমষ্টি তিনিটাত বিজেপিৰ প্রার্থী প্রক্ষেপ কৰিব বুলি আশা প্রকাশ কৰে বিজেপিৰ বাক্সা জিলা সমিতিৰ সভাপতি ৰাম দাহালে৷ সংবাদ মেলত বিজেপিৰ ৰাজ্যিক কার্যনির্বাহক ৰমেশ চন্দ্র দাস, মুছলপুৰ মণ্ডল সমিতি, টিহু যুৱ মর্চা সমিতি, বাক্সা জিলা সমিতিৰ কেইবাজনো বিষয়ববীয়া উপস্থিত থাকে৷