নিয়মীয়া বাৰ্তা, ১৬ ডিচেম্বৰঃ তিৱা স্বায়ত্ত পৰিষদৰ নির্বাচনৰ নির্বাচনী প্রচাৰৰ আজি অন্তিমটো দিনত প্রতিটো ৰাজনৈতিক দলেই নিজ নিজ প্রার্থীৰ হৈ শক্তি প্রদর্শনত নামি পৰে৷ মৰিয়নিৰ বিধায়ক ৰূপজ্যোতি কুর্মীয়ে নিজেই গাডী চলাই বঢ়মপুৰৰ বামুণীত উপস্থিত হ’ল৷ নিজেই চালকৰ আসনত বহি গাডী চলাই বামুণীৰ অলিয়ে–গলিয়ে বিধায়কগৰাকীয়ে ৩১নং লালুংপাৰ সমষ্টিৰ কংগ্রেছ দলৰ প্রার্থী ৰঞ্জিত বসুমতাৰীৰ হৈ প্রচাৰ চলায়৷
বিধায়কগৰাকীয়ে কেইবাখনো নির্বাচনী প্রচাৰ সভাত অংশ লৈ প্রদেশ কংগ্রেছৰ সম্পাদক সুৰেশ বৰাক লগত লৈ পথৰ কাষৰ হোটেলত চাহ খায়৷ বিধায়ক ৰূপজ্যোতি কুর্মীক কাষত পায় উৎফুল্ল হৈ পৰিল স্থানীয় ৰাইজ৷ ঝুমুৰৰ তালে তালে আৰু গীতৰ তালে তালে নাচি–বাগি কেইবাখনো নির্বাচনী প্রচাৰত অংশ লৈ ৰাইজক উদ্দেশ্যি ভাষণ প্রদান কৰি বিধায়ক ৰূপজ্যোতি কুর্মীয়ে সংবাদ মাধ্যমৰ সন্মুখত কেইবাটাও গুৰুত্বপূর্ণ মন্তব্য কৰে৷ তিৱা স্বায়ত্ত পৰিষদ এইবাৰ কংগ্রেছ দলে গঠন কৰিব বুলি মন্তব্য কৰাৰ লগতে প্রদেশ কংগ্রেছৰ নেতৃত্ব সন্দর্ভত কয় যে অতি কম দিনতে প্রদেশ কংগ্রেছৰ নেতৃত্ব সলনি হ’ব৷ ইতিমধ্যেই প্রাৰম্ভিক কাম–কাজ আৰম্ভ হৈছে বুলি মন্তব্য কৰাৰ লগতে ২১ৰ নির্বাচনত নতুন নেতৃত্বৰ জৰিয়তে কংগ্রেছ দল নির্বাচনত অৱতীর্ণ হ’ব বুলি তেওঁ কয়৷