নিয়মীয়া বাৰ্তা, ৫ ছেপ্টেম্বৰঃ আজি শিক্ষক দিৱস। চাৰ সৰ্বপল্লী ৰাধাকৃষ্ণণৰ আজি জন্মদিন। ক’ভিডকালীন পৰিস্থিতিৰ পৰিপ্ৰেক্ষিতত শিক্ষক দিৱসৰ লগত সংগতি ৰাখি গহপুৰৰ ডিপৰা বিৰিঙানী বৰ নামঘৰত এক ব্যতিক্ৰমী কাৰ্যসূচীৰে অনুষ্ঠিত হয় শিক্ষক দিৱস।
ডিপৰাৰ উচ্চ শিক্ষিত যুৱক ৰিপাংকৰ শইকীয়াৰ একক প্ৰচেষ্টাত আয়োজন কৰা শিক্ষক দিৱসৰ এই অনুষ্ঠানটোত অঞ্চলটোৰ অৱসৰপ্ৰাপ্ত শিক্ষক ক্ৰমে নন্দী শইকীয়া, পূৰ্ণ শৰ্ম্মা, পূৰ্ণ মহন্তৰ লগতে ডিপৰা অঞ্চলৰ অংগনবাড়ী শিক্ষয়ত্ৰী ৰেখা শইকীয়াক সম্বৰ্ধনা জ্ঞাপন কৰা হয়।
অঞ্চলটোৰ এগৰাকী বিশিষ্ট্য ব্যক্তি যামিনী বৰুৱাৰ সভাপতিত্বত অনুষ্ঠিত এই অনুষ্ঠানটো বিৰিঙানী খেলৰ গোপিনীসকলে পৰিৱেশন কৰা দিহানামেৰে আৰম্ভ হয়। শিক্ষক দিৱসৰ অনুষ্ঠানটোত ছাত্ৰ-ছাত্ৰীসকলৰ মাজত আকষ্মিক বক্তৃতা, ৰচনা আৰু কবিতা আবৃত্তি প্ৰতিযোগিতা আয়োজন কৰা হয়।
উক্ত অনুষ্ঠানটোত কেইবাগৰাকী বিশিষ্ট ব্যক্তিৰ উপৰি ঘৰুৱা শিক্ষাৰ লগত জড়িত প্ৰায় ৪৫ গৰাকী ছাত্ৰ-ছাত্ৰী আৰু বহু সংখ্যক অভিভাৱক উপস্থিত থাকে।
