নিয়মীয়া বাৰ্তা, ১৯ জুলাই: কলাইগাঁৱৰ উদমাৰীস্থিত জৱাহৰ নৱোদয় বিদ্যালয়ৰ অধ্যক্ষক পঘাৰে বান্ধি অত্যাচাৰ কৰা ঘটনাই তীব্র চাঞ্চল্য সৃষ্টি কৰিছে৷ অধ্যক্ষগৰাকীক পঘাৰে বান্ধি অত্যাচাৰ কৰা ভিডিঅ’ দেওবাৰে কলাইগাঁৱৰ বৃহত্তৰ অঞ্চলটোত ভাইৰেল হৈ পৰে৷ এই ঘটনা সন্দর্ভত আৰক্ষীয়ে শিক্ষানুষ্ঠানখনৰ দুই শিক্ষক ক্রমে কালুৰাম মীনা আৰু মদনলাল গুপ্তাক গ্রেপ্তাৰ কৰিছে৷
ঘটনাটো ক্ষিপ্র তদন্ত কৰা দৰং আৰক্ষীয়ে আজি আৰু কেইবাজনকো গ্রেপ্তাৰ কৰাৰ সম্ভাৱনা আছে৷
লক্ষণীয় যে অধ্যক্ষগৰাকীক বান্ধি অত্যাচাৰ কৰা ঘটনা সন্দর্ভত এজাহাৰ দাখিল কৰা হৈছিল৷ এই এজাহাৰত নাৰী নির্যাতনৰ বিষয় উত্থাপন কৰা হৈছিল৷ আৰক্ষীয়ে ভাইৰেল ভিডিঅ’টো ভালদৰে পৰীক্ষা কৰাৰ পাছতে বিষয়টোৱে অন্য ৰূপ লয়৷ এটা সূত্র মতে কোনো ঘটনাক লৈ অনুশাসন ভংগৰ অভিযোগত অধ্যক্ষই শিক্ষক দুজনক নিলম্বন কৰে৷ যাৰ বাবে শিক্ষক দুগৰাকীয়ে আন সহযোগীৰে অধ্যক্ষগৰাকীক ৰছীৰে বান্ধি অত্যাচাৰ কৰি ঘটনাটো আন দিশে ঢ়াল খুওৱাৰ চেষ্টা কৰে৷ দৰং আৰক্ষীৰ তদন্তত প্রকৃত ঘটনা ওলাই পৰাৰ পাছতে অধ্যক্ষক প্রহাৰ কৰা দুই শিক্ষক কালুৰাম মীনা আৰু মদনলাল গুপ্তাক গ্রেপ্তাৰ কৰে৷