নিয়মীয়া বাৰ্তা, ১০ ডিচেম্বৰ: আজি মাৰ্ঘেৰিটাত অনুষ্ঠিত হয় মানৱ অধিকাৰ দিৱস । ৰেড ক্ৰছ ছ’চাইটি মাৰ্ঘেৰিটা শাখাৰ উদ্যোগত আজি মানৱ অধিকাৰ দিৱস মাৰ্ঘেৰিটা ইণ্ডিয়া ক্লাৱত অনুষ্ঠিত কৰে। মানৱ অধিকাৰ দিৱস সমগ্ৰ বিশ্বত প্ৰতিবছৰে ১০ ডিচেম্বৰ তাৰিখে পালন কৰা হয়। ৰাষ্ট্ৰসংঘৰ ১৯৪৮ চনৰ ১০ ডিচেম্বৰত, মানৱ অধিকাৰৰ সৰ্বজনীন ঘোষণা (ইউডিএইচআৰ), মানৱ অধিকাৰৰ প্ৰথম বিশ্বব্যাপী ঘোষণা আৰু নতুন ৰাষ্ট্ৰসংঘৰ প্ৰথমটো মুখ্য সফলতাৰ প্ৰতি সন্মান প্ৰদৰ্শন কৰি ১০ ডিচেম্বৰ তাৰিখটোত মানৱ অধিকাৰ দিৱস হিচাপে বাছনি কৰা হৈছিল। তেতিয়াৰে পৰা সমগ্ৰ বিশ্বত মানৱ অধিকাৰ দিৱসটি অনুষ্ঠিত হৈ আহিছে।
ডিগবৈ মহাবিদ্যালয়ৰ উপাধ্যক্ষ ড° অৰুন চন্দ্ৰ দত্তই পৌৰোহিত্যত কৰা আজিৰ অনুষ্ঠানত মুখ্যবক্তা হিচাপে উপস্থিত থাকে মুৰব্বী অধ্যাপক আইন বিভাগ অসম সমবায় বিশ্ব বিদ্যালয় ড° দিপম বৰুৱাই, জ্যেষ্ঠ অধিবক্তা ভাস্কৰ দত্ত আলোচক হিচাপে থকা অনুষ্ঠানত আদিৰণি ভাষণ প্ৰদান কৰে ৰেড ক্ৰছ ছ’চাইটিৰ মাৰ্ঘেৰিটাৰ শাখাৰ সম্পাদক পৱিত্ৰ বৰগোহাঞিয়ে।
অন্যহাতে সভাত মাৰ্ঘেৰিটা বিধায়ক ভাস্কৰ শৰ্মা, মাৰ্ঘেৰিটা মহাবিদ্যালয়ৰ নৱ নিযুক্তি অধ্যক্ষ ড° অতনু কাকতী, লিডু মহাবিদ্যালয়ৰ অধ্যক্ষ ড° কৃপা প্ৰসাদ উপাধ্যায়, ড° হৰি নাৰয়ণ বৰকতকী, মাৰ্ঘেৰিটা উচ্চতৰ মাধ্যমিক বিদ্যালয়ৰ অধ্যক্ষ ৰিনা খনিকৰ লগতে কেইবাগৰাকীয় গণ্যমান্য ব্যক্তি সভাত উপস্থিত থাকে। মাৰ্ঘেৰিটা মহকুমাৰ প্ৰায় সংখ্যক বিদ্যালয় মহাবিদ্যালয়ৰ ছাত্ৰ ছাত্ৰীৰ লগতে প্ৰায় ৫ শতাধিক লোক আজিৰ সভাত উপস্থিত থাকে। ১৯৪৮ চনৰ পৰা প্ৰতি বছৰে ১০ ডিচেম্বৰ তাৰিখটো যথাযোগ্য মৰ্যাদা ও গুৰুত্বৰ সৈতে বিশ্বব্যাপী মানৱ অধিকাৰ দিৱস হিচাপে পালিত হয়। দিৱসটো জাতিসংঘ কৰ্তৃপক্ষৰ দ্বাৰা স্বীকৃত আৰু বিশ্বৰ সৰ্বতে পালিত হয়।
প্ৰেৰকঃ মানস প্ৰতিম গগৈ, মাৰ্ঘেৰিটা