নিয়মীয়া বাৰ্তা, ৩০ জানুৱাৰীঃ কঠিন যুঁজৰ অন্তত পৰাস্ত হৈ চলিত অষ্ট্রেলিয়ান অ’পেনৰ পুৰুষ ছিংগলছৰ কোৱার্টাৰ ফাইনেলতে অভিযান সামৰিলে শীর্ষ বাছনিৰ স্পেইনৰ ৰাফেল নাডালে৷ ৰোড লেভাৰ এৰেনাত কালি অনুষ্ঠিত পুৰুষ ছিংগলছৰ চতুর্থখন কোৱার্টাৰ ফাইনেলত নাডালে পঞ্চম বাছনিৰ অষ্ট্রেলিয়াৰ ডমিনিক থিয়েমাৰ হাতত কঠিন যুঁজৰ অন্তত পৰাস্ত হয়৷ চাৰি ঘণ্টা ১০ মিনিট ধৰি চলা মেচখনত প্রাক্তন চেম্পিয়ন নাডালে ৬–৭ (৩–৭), ৬–৭ (৪–৭), ৬–৪, ৬–৭ (৬–৮) ছেটত পৰাজয় স্বীকাৰ কৰে৷
উল্লেখ্য যে অষ্ট্রেলিয়ান অ’পেনৰ ছেমিত প্রৱেশ কৰা থিয়েম হ’ল অষ্ট্রেলিয়াৰ দ্বিতীয়গৰাকী পুৰুষ খেলুৱৈ৷ থিয়েমৰ পূর্বে ১৯৮৯ আৰু ১৯৯৭ চনত থমাছ মুষ্টাৰে অষ্ট্রেলিয়ান অ’পেনৰ অন্তিম চাৰিত প্রৱেশ কৰিছিল৷ ছেমিফাইনেলত থিয়েমে সপ্তম বাছনিপ্রাপ্ত জার্মানীৰ আলেকজেণ্ডাৰ জেৰেভৰে মুখামুখি হ’ব৷ আন এখন কোৱার্টাৰ ফাইনেলত জেৰেভে প্রাক্তন চেম্পিয়ন ছুইজাৰলেণ্ডৰ ষ্টানিশ্লাছ ৱাৰিংকাক ১–৬, ৬–৩, ৬–৪, ৬–২ ছেটত পৰাস্ত কৰে আৰু প্রথমবাৰৰ বাবে গ্রেণ্ডশ্লামৰ ছেমিফাইনেলত প্রৱেশ কৰে জার্মানীৰ তাৰকা খেলুৱৈগৰাকীয়ে৷ ইফালে, মহিলা শাখাৰ ছিংগলছৰ ছেমিফাইনেলত মুখামুখি হ’ব চতুর্থ বাছনিপ্রাপ্ত ৰোমানিয়াৰ ছিমনা হালেপ আৰু অবাছনিপ্রাপ্ত গার্বিন মুগুৰুজা৷
ছেমিফাইনেলত হালেপে ২৮সংখ্যক বাছনিৰ ইষ্ট’নিয়াৰ এনেট কণ্টাভিয়েটক মাত্র ৫৩ মিনিটতে ৬–১, ৬–১ ছেটত পৰাস্ত কৰে৷
ইফালে, আন এখন কোৱার্টাৰত স্পেইনৰ মুগুৰুজাই ৰাছিয়াৰ আনাষ্টাছিয়া পাভলিয়ুছেনক’ভাক ৭–৫, ৬–৩ ছেটত পৰাস্ত কৰি প্রথমবাৰৰ বাবে অষ্ট্রেলিয়ান অ’পেনৰ ছেমিফাইনেলত স্থান নিশ্চিত কৰে৷ মহিলা শাখাৰ ছিংগলছৰ আনখন ছেমিত মুখামুখি হ’ব শীর্ষ বাছনিৰ এছলে বার্টি আৰু চতুর্দশ বাছনিৰ ছ’ফিয়া কেনিন৷