নিয়মীয়া বাৰ্তা, ২১ এপ্রিলঃ মহামাৰী ক’ৰোনা ভাইৰাছৰ আতংকৰ বাবে স্তব্ধ হৈ পৰা আন্তঃৰাষ্ট্রীয় ক্রিকেটৰ ভৱিষ্যৎ কার্যক্রমণিকা সন্দর্ভত আলোচনা কৰিবলৈ ২৩ এপ্রিলত এক গুৰুত্বপূর্ণ বৈঠক আহ্বান কৰিছে আন্তঃৰাষ্ট্রীয় ক্রিকেট কাউন্সিলে ৷ ভিডিঅ’ কনফাৰেঞ্চৰ জৰিয়তে অনুষ্ঠিত হ’বলগীয়া এই বৈঠকত আই চি চিৰ ১২খন পূর্ণাংগ ৰাষ্ট্র আৰু তিনিখন সহযোগী ৰাষ্ট্রৰ প্রতিনিধিসকল মিলিত হ’ব ৷ ক’ভিড–১৯ মহামাৰীয়ে বিশ্বত প্রলয়ৰ সৃষ্টি কৰাৰ পিছত ক্রিকেটৰ ভৱিষ্যৎ সন্দর্ভত আই চি চিৰ সকলো সদস্যই প্রথমবাৰৰ বাবে আলোচনাত অংশ ল’ব ৷ বি চি চি আইৰ হৈ সম্পাদক জয় শ্বাহে বৈঠকত উপস্থিত থাকিব৷ এই বৈঠকত মহামাৰীৰ প্রাদুর্ভাৱৰ বাবে শেহতীয়াকৈ স্থগিত হোৱা আন্তঃৰাষ্ট্রীয় ক্রিকেট শৃংখলাৰ সূচী পুনৰ নির্ধাৰণ আৰু ভৱিষ্যতৰ ভ্রমণ কার্যসূচী সন্দর্ভত বিস্তৃতভাৱে আলোচনা কৰা হ’ব৷ আই চি চিৰ মুখ্য কার্যবাহী বিষয়া মনু শ্ব’নিয়ে আজি এক বিবৃতিত এই কথা প্রকাশ কৰে৷ ‘চলিত মহামাৰীৰ প্রভাৱত ক্রিকেট বিশ্ব স্তব্ধ হোৱাৰ পিছত প্রথমবাৰৰ বাবে আই চি চিয়ে এইধৰণৰ বৈঠকৰ আয়োজন কৰিছে৷ ইয়াৰ জৰিয়তে সকলো দেশৰ মতামত গ্রহণ কৰি এক ঐক্যবদ্ধ কার্যসূচী প্রস্তুত কৰা হ’ব৷ ক্রিকেটক পুনৰ শক্তিশালী ৰূপত ওভতাই অনাৰ ক্ষেত্রত সকলো দেশৰ মতামত গ্রহণ কৰা হ’ব৷’ আই চি চিৰ মুখ্য কার্যবাহী বিষয়াগৰাকীয়ে এইদৰে কয়৷ উল্লেখ্য যে বিগত প্রায় এমাহ ধৰি ক্রিকেটৰ সকলো সৰু–বৰ ইভেণ্ট স্থগিত হৈ থকাত ভৱিষ্যতৰ আন্তঃৰাষ্ট্রীয় ক্রিকেট সূচীত ব্যাপক সালসলনি অনিবার্য হৈ পৰিছে৷