নিয়মীয়া বাৰ্তা ১৩ মাৰ্চঃ ৱেষ্ট ইণ্ডিজৰ তাৰকা অ’পেনাৰ ক্রেইগ ব্রাথৱেইটক দলটোৰ টেষ্ট অধিনায়ক নিযুক্ত কৰা হৈছে৷ অলৰাউণ্ডাৰ জেছন হল্ডাৰৰ সলনি বাঁওহতীয়া আক্রমণাত্মক বেটছমেনগৰাকীক এই নতুন দায়িত্ব অর্পণ কৰা হৈছে৷ উল্লেখ্য যে ২০১৫ৰ পৰা জেছন হল্ডাৰৰ নেতৃত্বত ৱেষ্ট ইণ্ডিজে ৩৭খন টেষ্ট খেলিছে৷ শেহতীয়াকৈ হল্ডাৰৰ অনুপস্থিতিত ব্রাথৱেইটে ৱেষ্ট ইণ্ডিজক নেতৃত্ব দি বাংলাদেশৰ বিৰুদ্ধে টেষ্ট শৃংখলাত ২–০ৰ ব্যৱধানত চমকপ্রদ বিজয় সাব্যস্ত কৰিবলৈ সক্ষম হৈছিল৷ চলিত মাহত ব্রাথৱেইটৰ নেতৃত্বত ৱেষ্ট ইণ্ডিজে শ্রীলংকাৰ বিৰুদ্ধে দুখন টেষ্ট খেলিব৷ ব্রাথৱেইট হ’ল ৱেষ্ট ইণ্ডিজৰ ৩৭সংখ্যক টেষ্ট অধিনায়ক৷ ইফালে, জেছন হল্ডাৰে দলত অলৰাউণ্ডাৰৰ ৰূপত গুৰুত্বপূর্ণ ভূমিকা গ্রহণ কৰি যাব বুলি ৱেষ্ট ইণ্ডিজ ক্রিকেট ব’র্ডে স্পষ্ট কৰিছে৷