নিয়মীয়া বাৰ্তা, ১৭ ডিচেম্বৰঃ বদৌচা স্পৰ্টচ ক্লাবৰ উদ্যোগত অসম ফুটবল সন্হাৰ তত্বাৱধানত ভাৰতীয় ফুটবল সন্হাৰ স্বীকৃতিপ্ৰাপ্ত ত্ৰয়োদশ বাৰ্ষিক ৰাষ্ট্ৰীয় পৰ্যায়ৰ আমন্ত্ৰণমূলক ফুটবল প্ৰতিযোগিতাৰ ছেমি ফাইনেলৰ প্ৰথমখন খেল বৃহস্পতিবাৰে দুলীয়াজান নেহেৰু ময়দানত অনুষ্ঠিত হয়। বদৌচা কাপৰ ছেমি ফাইনেলৰ প্ৰথম খেলখন কেৰেলাৰ ল’কা চকাৰ ক্লাব আৰু ইষ্টাৰ্ণ ৰেলৱে ফুটবল ক্লাব হাওৰাৰ মাজত অনুষ্ঠিত হয় । খেলত কেৰেলা ল’কা চকাই ১–০ গ’লত ইষ্টাৰ্ণ ৰেলৱেক হৰুৱাই ফাইনেলত প্ৰৱেশ কৰে । কেৰেলা ল’কা চকাৰ হৈ প্ৰথমাৰ্ধৰ তিনি মিনিটত ৩০ নম্বৰ জাৰ্চি পৰিহিত লুথাইফেই ইষ্টাৰ্ণ ৰে’লৱেক বিজয়ী গ’লটো শোধাই। খেলখন পৰিচালনাত সহায় কৰে মুখ্য ৰেফাৰী ইনুথ চাউৰক আৰু সহযোগী ক্ৰমে অসীম হাজৰিকা, বিদ্যুৎ বৰুৱা । চতুৰ্থ ৰেফাৰী জীৱন গগৈ । ছেমি ফাইনেলৰ দ্বিতীয়খন খেল কাইলৈ তিনিচুকীয়াৰ কচুজান খেলপথাৰত কেৰেলাৰ ইউনাইটেড বনাম চি আই এচ এফ দিল্লীৰ মাজত অনুষ্ঠিত হ’ব ।
ইফালে ফাইনেল খেলখন অহা ১৯ ডিচেম্বৰত তিনিচুকীয়া জিলা ক্ৰীড়া সন্হাৰ খেলপথাৰত অনুষ্ঠিত হ’ব । শ্ৰেষ্ঠ খেলুৱৈ বিবেচিত হয় কেৰেলা ল’কা চকাৰ ক্লাবৰ মহম্মদ শ্বাহিল এ টি । বিজয়ী দলটোক বঁটা প্ৰদান কৰে দুলীয়াজান সমষ্টিৰ বিধায়ক তেৰছ গোৱালা আৰু বডৌচা স্প’ৰ্টচ ক্লাবৰ সভাপতি তথা অসম ফুটবল সন্হাৰ উপ সভাপতি অৰুণজ্যোতি মৰাণে । উপস্থিত থাকে মৰাণ ছাত্ৰ সন্হাৰ সভাপতি নৱ মৰাণ, প্ৰাক্তন আন্তঃৰাষ্ট্ৰীয় খেলুৱৈ ক্ৰমে স্বাধীন ডেকাৰজা, ডম্বৰু খনিকৰ, মঞ্জু শইকীয়া, ক্ৰীড়া সংগঠক কৰুণজ্যোতি শইকীয়া আদি বিশিষ্ট ব্যক্তিসকল।