নিয়মীয়া বাৰ্তা ৩১ ডিচেম্বৰঃ অহা বর্ষত অনুষ্ঠিত হ’বলগীয়া আই চি চি ৱর্ল্ড টেষ্ট চেম্পিয়নশ্বিপৰ ফাইনেল খেলাৰ আশা সজীৱ কৰি ৰাখিছে টীম ইণ্ডিয়াই৷ মেলব’ন টেষ্টত দুর্দান্ত জয়েৰে দলটোৱে আই চি চি টেষ্ট ৰেংকিঙৰ দ্বিতীয় স্থান অক্ষুণ্ণ ৰাখি ৱর্ল্ড টেষ্ট চেম্পিয়নশ্বিপৰ ফাইনেলত প্রৱেশৰ সম্ভাৱনা জীয়াই ৰাখিছে৷ আই চি চিয়ে আজি প্রকাশ কৰা নতুন পইণ্ট তালিকা অনুসৰি অষ্ট্রেলিয়াই প্রথম, ভাৰতে দ্বিতীয় আৰু নিউজিলেণ্ডে তৃতীয় স্থান অক্ষুণ্ণ ৰাখিবলৈ সক্ষম হৈছে৷ বক্সিং ডে’ টেষ্টত অষ্ট্রেলিয়াক পৰাস্ত কৰাৰ সুবাদত আজিংক্য ৰাহানে নেতৃত্বাধীন দলটোৱে মূল্যৱান ৩০ পইণ্ট অর্জন কৰিছে৷ দলটোৱে সম্প্রতি ৩৯০ পইণ্ট আৰু ৭২.২ পাৰচেণ্টেজ অৱ পইণ্টছ (পি চি টি)ৰ সৈতে দ্বিতীয় স্থানত আছে৷ মেলব’নত ভাৰতৰ হাতত শোচনীয় পৰাজয়ৰ সন্মুখীন হ’লেও অষ্ট্রেলিয়াই ৭৬.৬ পি চি টিৰ সৈতে শীর্ষস্থান অক্ষুণ্ণ ৰাখিছে৷ ইফালে, নিউজিলেণ্ডে আজি প্রথম টেষ্টত পাকিস্তানক ১০১ ৰানত পৰাস্ত কৰাৰ সুবাদত তৃতীয় স্থান নিজৰ দখলত ৰাখিবলৈ সক্ষম হৈছে৷ মন কৰিবলগীয়া যে আই চি চিয়ে দুবছৰ পূর্বে আৰম্ভ কৰা বিশ্ব টেষ্ট চেম্পিয়নশ্বিপৰ নিয়ম অনুসৰি লীগ পর্যায়ৰ শীর্ষস্থানপ্রাপ্ত দুটা দলে ২০২১ত ফাইনেল খেলাৰ সুযোগ পাব৷