নিয়মীয়া বাৰ্তা ১৬ ফেব্ৰুৱাৰীঃ দ্বিতীয় বাছনিপ্রাপ্ত স্পেইনৰ ৰাফেল নাডালে সহজ জয়েৰে চলিত অষ্ট্রেলিয়ান অ’পেনৰ পুৰুষ ছিংগলছৰ কোৱার্টাৰ ফাইনেলত স্থান সুৰক্ষিত কৰিছে৷ চতুর্থ ৰাউণ্ডৰ মেচ এখনত নাডালে ষষ্ঠদশ বাছনিৰ ফাবি’ ফগনিনিক পোনপটীয়াকৈ ৬–৩, ৬–৪, ৬–২ ছেটত পৰাস্ত কৰে৷ কোৱার্টাৰ ফাইনেলত নাডালে ষ্টেফান’ছ টিটচিপাছৰে মুখামুখি হ’ব৷ ইফালে, পঞ্চম বাছনিৰ টিটচিপাছ আৰু সপ্তম বাছনিৰ আন্দ্রে ৰুবলেভে ৱাক’ভাৰ লাভ কৰি কোৱার্টাৰত প্রৱেশ কৰে৷ চতুর্থ ৰাউণ্ডৰ মেচখনত বেৰেট্টিনীয়ে ভাগ নোলোৱাত টিটচিপাছে অগ্রগতি লাভ কৰে৷
ইফালে, কেচপাৰ ৰুডৰে খেলা চতুর্থ ৰাউণ্ডৰ মেচখনত ৰুবলেভে ৬–২, ৭–৬ (৭–৩) ছেটত আগবাঢ়ি থকাৰ সময়তে ৰুডে মেচখনৰ পৰা অৱসৰ লয়৷ আনহাতে, চতুর্থ বাছনিৰ ডানিল মেডভেডেভে মেকেঞ্জি মেকড’নাল্ডক পৰাস্ত কৰি অন্তিম আঠত প্রৱেশ কৰে৷ মহিলা শাখাৰ ছিংগলছৰ কোৱার্টাৰত স্থান সুৰক্ষিত কৰিছে শীর্ষ বাছনিৰ এছলে বার্টিৰ লগতে ২২সংখ্যক বাছনিৰ জেনিফাৰ ব্রেডি, ২৫সংখ্যক বাছনিৰ কাৰোলিনা মুছ’ভা আৰু জেছিকা পেগুলাই৷ বার্টিয়ে চেলবি ৰ’জার্ছক, ব্রেডিয়ে ড’নাভেকিচক আৰু মুছ’ভাই অষ্টাদশ বাছনিৰ মার্টেনছক হৰুৱায়৷ ইফালে, পঞ্চম বাছনিৰ এলিনা চিট’লিনাই পেগুলাৰ হাতত পৰাস্ত হৈ চতুর্থ ৰাউণ্ডৰ পৰা বিদায় লৈছে৷