নিয়মীয়া বাৰ্তা,৩০ মেঃ ঘৰুৱা দল অষ্ট্রেলিয়া আৰু টীম ইণ্ডিয়াৰ মাজত হ’বলগীয়া আগন্তুক টেষ্ট শৃংখলাটোত বৃহৎ সালসলনি হোৱাৰ ইংগিত দিছে ক্রিকেট অষ্ট্রেলিয়াই৷ মহামাৰী ক’ৰোনা ভাইৰাছৰ ভয়াৱহতাৰ বাবে দুয়ো দেশৰ মাজৰ চাৰিখনীয়া টেষ্ট শৃংখলাটো সালসলনি হোৱাৰ পূর্ণ সম্ভাৱনা আছে৷ প্রয়োজন সাপেক্ষে এই টেষ্ট শৃংখলাটোৰ চাৰিওখন টেষ্ট মেচ একেখন ষ্টেডিয়ামতে আয়োজন কৰা হ’ব পাৰে বুলি উল্লেখ কৰি ক্রিকেট অষ্ট্রেলিয়াৰ মুখ্য কার্যবাহী বিষয়া কেবি ৰবার্টছে কয় যে খেলুৱৈসকলৰ স্বাস্থ্য আৰু জীৱনৰ সুৰক্ষাৰ প্রতি লক্ষ্য ৰাখিয়েই ভাৰত আৰু অষ্ট্রেলিয়াৰ মাজৰ টেষ্ট শৃংখলাটোৰ সূচীখন সালসলনি কৰা হ’ব পাৰে৷ দুয়ো দেশৰ মাজৰ টেষ্টকেইখন ক্রমে ৩–৭ ডিচেম্বৰত ব্রিছবেন, ১১–১৫ ডিচেম্বৰত এডিলেইড, ২৬–৩০ ডিচেম্বৰত মেলব’ন আৰু ৩–৭ জানুৱাৰীত ছিডনীত খেলোৱা হ’ব বুলি বৃহস্পতিবাৰে ক্রিকেট অষ্ট্রেলিয়াই ঘোষণা কৰিছিল যদিও আজি দেশখনৰ ক্রিকেট ব’ডৰ মুখ্য কার্যবাহী বিষয়াগৰাকীয়ে কয় যে দেশখনৰ পৰিস্থিতিৰ ওপৰত টেষ্ট শৃংখলাটোৰ সূচী নির্ভৰ কৰিব৷ প্রয়োজনসাপেক্ষে চাৰিওখন টেষ্ট এখন ষ্টেডিয়ামতে আয়োজন কৰিবলগীয়া হ’ব পাৰে৷