নিয়মীয়া বাৰ্তা ১ জুলাইঃ নিউজিলেণ্ড ক্রিকেট দলটোৰ অধিনায়ক কেন উইলিয়ামছনে আই চি চি টেষ্ট ৰেংকিঙৰ বেটছমেন শাখাৰ শীর্ষস্থানটো পুনৰ উদ্ধাৰ কৰিবলৈ সক্ষম হৈছে৷ সদ্যপ্রকাশিত ৰেংকিঙত উইলিয়ামছনে অষ্ট্রেলিয়াৰ ষ্টিভেন স্মিথক আঁতৰাই শীর্ষস্থানটো দখল কৰে৷ টীম ইণ্ডিয়াৰ বিপক্ষে সদ্যসমাপ্ত বিশ্ব টেষ্ট চেম্পিয়নশ্বিপৰ ফাইনেলত দর্শনীয় ইনিংছ খেলাৰ সুবাদত উইলিয়ামছনে শীর্ষস্থানটো নিজৰ দখললৈ আনে৷ ৯০১ ৰেটিং পইণ্টেৰে উইলিয়ামছন শীর্ষস্থানত থকাৰ বিপৰীতে ৮৯১ পইণ্টেৰে স্মিথে দ্বিতীয় আৰু ৮৭৮ পইণ্টেৰে লাবুছানে তৃতীয় স্থানটো অধিকাৰ কৰি আছে৷
ইফালে, টীম ইণ্ডিয়াৰ অধিনায়ক কোহলিয়ে ৮১২ ৰেটিং পইণ্টেৰে চতুর্থ স্থানটো অক্ষুণ্ণ ৰাখিছে৷ ৰোহিত শর্মা এটা স্থান আগুৱাই ষষ্ঠ স্থানলৈ উন্নীত হোৱাৰ বিপৰীতে এটা স্থানৰ অৱনমন ঘটি ঋষভ পণ্টে সপ্তম স্থানটো লাভ কৰিছে৷ অষ্ট্রেলিয়াৰ পেট কামিনছে শীর্ষস্থান দখল কৰি থকা বলিং শাখাত ভাৰতীয় দলটোৰ ৰবিচন্দ্রন অশ্বিনে দ্বিতীয় স্থানটো অক্ষুণ্ণ ৰাখিছে৷ আনহাতে, বিগত সপ্তাহত অলৰাউণ্ড শাখাৰ শীর্ষস্থানটো দখল কৰা টীম ইণ্ডিয়াৰ ৰবীন্দ্র জাদেজা দ্বিতীয় স্থানলৈ অৱনমিত হৈছে৷ ৱেষ্ট ইণ্ডিজৰ জেছন হল্ডাৰে পুনৰ শীর্ষস্থানটো দখল কৰিবলৈ সক্ষম হৈছে৷