নিয়মীয়া বাৰ্তা, ৩ অক্টোবৰঃ আই পি এলৰ আৰম্ভণি পর্যায়তে কিৰণ পোলার্ডৰ চমকপ্রদ ফর্ম মুম্বাই ইণ্ডিয়ানছৰ বাবে শুভ সংকেত হিচাপে চিহ্ণিত হৈছে৷ তেওঁৰ শেহতীয়া প্রদর্শনে দলৰ আত্মবিশ্বাস দুগুণে বৃদ্ধি কৰিছে৷ এই মন্তব্য আগবঢ়াইছে মুম্বাই ইণ্ডিয়ানছৰ বলিং পৰামর্শদাতা জাহিৰ খানে৷
দলটোৰ টুইটাৰ একাউণ্টত তেওঁ আজি কয় যে পোলার্ডে কেৰিবিয়ান প্রিমিয়াৰ লীগৰ ফর্ম আই পি এলতো অটুট ৰাখিছে৷ এয়া মুম্বাই ইণ্ডিয়ানছৰ বাবে অত্যন্ত শুভ সংবাদ৷ প্রতিযোগিতাখনৰ আৰম্ভণিতে পোলার্ডৰ দুর্দান্ত ফর্মে ৰোহিত শর্মা নেতৃত্বাধীন দলটোক অধিক উজ্জীৱিত কৰিছে৷ উল্লেখ্য যে পোলার্ডে শেহতীয়াকৈ ৰয়েল চেলেঞ্জার্ছ বাংগালুৰুৰ বিৰুদ্ধে মাত্র ২৪ বলত ৬০ ৰানৰ আকর্ষণীয় ইনিংছ খেলে৷ ইয়াৰ পিছত যোৱানিশা কেৰিবিয়ান তাৰকাগৰাকীয়ে কিংছ একাদশ পঞ্জাবৰ বিৰুদ্ধে মাত্র ২০ বলৰ সন্মুখীন হৈ অপৰাজিতভাৱে ৪৭ ৰান সংগ্রহ কৰে৷
ইফালে, যোৱানিশাৰ মেচখনত সুন্দৰ বলিঙেৰে উজলি উঠা লেগ স্পীনাৰ ৰাহুল চহৰ আৰু বাঁওহতীয়া স্পীনাৰ ক্রুনাল পাণ্ডিয়াক জাহিৰ খানে ভূয়সী প্রশংসা কৰে৷