নিয়মীয়া বাৰ্তা, ২৪ জুনঃ ইংলিছ প্রিমিয়াৰ লীগত খিতাপ জয়ৰ আশা সজীৱ কৰি তুলিছে মানচেষ্টাৰ চিটীয়ে৷ দর্শকশূন্য ইটিহাড ষ্টেডিয়ামত অনুষ্ঠিত এখন মেচত দলটোৱে বার্নলিক ৫–০ গ’লৰ ব্যৱধানত পৰাস্ত কৰিবলৈ সক্ষম হয়৷ এই জয়েৰে দ্বিতীয় স্থানপ্রাপ্ত মানচেষ্টাৰ চিটীয়ে পইণ্টৰ সংখ্যা ৬৩লৈ বৃদ্ধি কৰিছে৷ দলটোৱে ৩০খন মেচৰ ২০খনত জয়, ৩খনত ড্র আৰু ৭খনত পৰাজয়ৰ সন্মুখীন হৈছে৷
শীর্ষ স্থানপ্রাপ্ত লিভাৰপুলৰ পইণ্টৰ সংখ্যা এতিয়ালৈকে ৮৩ যদিও মানচেষ্টাৰ চিটীয়ে অৱশিষ্ট ৮খন মেচত উন্নত প্রদর্শন দাঙি ধৰিবলৈ সক্ষম হ’লে দলটোৱে লিভাৰপুলক অতিক্রম কৰাৰ সম্ভাৱনা আছে৷ যোৱানিশাৰ মেচখনত বার্নলিৰ বিৰুদ্ধে সম্পূর্ণৰূপে আধিপত্য বিস্তাৰ কৰি মানচেষ্টাৰ চিটীয়ে বৃহৎ জয় সাব্যস্ত কৰাৰ মূলতে আছিল পি ফোডেন আৰু আৰ মাহৰেজৰ দুগ’ল৷ ফোডেনে ২২, ৬৩ মিনিটত আৰু মাহৰেজে ৪৩ আৰু ৪৫ মিনিটত গ’লকেইটা কৰিবলৈ সক্ষম হয়৷ ৫১ মিনিটত আনটো গ’ল কৰে ডি ছিলভাই৷