নিয়মীয়া বাৰ্তা ৩ জানুৱাৰীঃ পেৰিছ ছেইণ্ট জার্মানৰ শিবিৰত মহামাৰী ক’ভিড–১৯এ আতংকৰ সৃষ্টি কৰিছে৷ ফ্রেন্স লীগ–১ৰ আগশাৰীৰ ক্লাবটোৰ ছুপাৰষ্টাৰ লি’নেল মেছিকে ধৰি মুঠ চাৰিগৰাকী খেলুৱৈ ক’ভিড–১৯ত আক্রান্ত হৈছে৷ ক্লাবটোৱে এই কথা সদৰী কৰিছে৷ মেছিৰ লগতে ক’ভিডত আক্রান্ত আন খেলুৱৈকেইগৰাকী হ’ল জুৱান বার্নেট, ছার্জি’ ৰিক’ আৰু নাথান বিতুমাজালা৷ পি এছ জিয়ে এক বিবৃতিত প্রকাশ কৰা অনুসৰি ক’ভিড পজিটিভ চাৰিওগৰাকী খেলুৱৈ সম্প্রতি আইছ’লেচনত আছে আৰু চিকিৎসকে তেওঁলোকৰ স্বাস্থ্যৰ ওপৰত চোকা নজৰ ৰাখিছে৷
মন কৰিবলগীয়া যে কেৰিয়াৰৰ আৰম্ভণিৰে পৰা বার্চিলোনাৰ হৈ খেলা মেছিয়ে যোৱা আগষ্টত দলটো ত্যাগ কৰি পি এছ জিত যোগ দিছিল৷ ৩৪ বছৰীয়া ছুপাৰষ্টাৰগৰাকীয়ে পেৰিছৰ দলটোৰ হৈ ১৬খন মেচ খেলি এতিয়ালৈকে ছটা গ’ল দিবলৈ সক্ষম হৈছে৷ লীগ ১ত পি এছ জি সম্প্রতি শীর্ষস্থানত আছে৷