নিয়মীয়া বাৰ্তা ২৪ জুনঃ সুদীর্ঘ ৪ বছৰৰ পিছত আই চি চি টেষ্ট ৰেংকিঙৰ অলৰাউণ্ডাৰ শাখাৰ শীর্ষস্থানটো দখল কৰিলে টীম ইণ্ডিয়াৰ ৰবীন্দ্র জাদেজাই৷ বুধবাৰে প্রকাশ পোৱা আই চি চি টেষ্ট ৰেংকিঙৰ অলৰাউণ্ডাৰ শাখাত জাদেজাই ৱেষ্ট ইণ্ডিজৰ জেছন হল্ডাৰক আঁতৰাই শীর্ষস্থানটো অধিকাৰ কৰে৷ জাদেজাই ৩৮৬ ৰেটিং পইণ্টেৰে শীর্ষস্থানলৈ উন্নীত হোৱাৰ বিপৰীতে ৩৮৪ ৰেটিং পইণ্টেৰে দ্বিতীয় স্থানলৈ অৱনমিত হয় জেছন হল্ডাৰ৷ ইফালে, ৩৭৭ ৰেটিং পইণ্টেৰে ইংলেণ্ডৰ বেন ষ্ট’কছে তৃতীয় আৰু ৩৫৩ ৰেটিং পইণ্টেৰে টীম ইণ্ডিয়াৰ ৰবিচন্দ্রন অশ্বিনে চতুর্থ স্থানটো অধিকাৰ কৰি আছে৷ বাংলাদেশৰ ছাকিব আল হাছান পঞ্চম স্থানত আছে৷ ইপিনে, বেটছমেন শাখাৰ শীর্ষ ১০লৈ উন্নীত হৈছে দক্ষিণ আফ্রিকাৰ কুইণ্টন ডি কক৷ ৱেষ্ট ইণ্ডিজৰ বিপক্ষে সদ্যসমাপ্ত টেষ্ট শৃংখলাটোত উন্নত প্রদর্শন দাঙি ধৰাৰ সুবাদত ডি ককে দশম স্থানটো অধিকাৰ কৰে৷ অষ্ট্রেলিয়াৰ ষ্টিভেন স্মিথে শীর্ষস্থান দখল কৰি থকা বেটছমেন শাখাত ভাৰতীয় দলটোৰ অধিনায়ক বিৰাট কোহলিয়ে চতুর্থ, উইকেটকীপাৰ বেটছমেন ঋষভ পণ্টে ষষ্ঠ আৰু তাৰকা বেটছমেন ৰোহিত শর্মাই সপ্তম স্থানটো অক্ষুণ্ণ ৰাখিছে৷