নিয়মীয়া বাৰ্তা, ১৩ ছেপ্টেম্বৰঃ প্রায় পাঁচ মাহ ধৰি খেলপথাৰৰ পৰা আঁতৰি থাকিলেও ৰয়েল চেলেঞ্জার্ছ বাংগালুৰুৰ খেলুৱৈসকলৰ শাৰীৰিক সক্ষমতা অক্ষুণ্ণ আছে৷ অহা ১৯ ছেপ্টেম্বৰৰ পৰা আৰম্ভ হ’বলগা আই পি এলৰ বাবে দলটোৰ প্রতিগৰাকী খেলুৱৈ শাৰীৰিক–মানসিকভা সাজু হৈ উঠিছে৷ বি চি চি আইৰ ঐশ্বর্যশালী টি–২০ লীগলৈ মাজত মাথোঁ কেইটামান দিন বাকী থকা অৱস্থাত এই তাৎপর্যপূর্ণ মন্তব্য আগবঢ়াইছে ৰয়েল চেলেঞ্জার্ছ বাংগালুৰুৰ অধিনায়ক বিৰাট কোহলিয়ে৷ ‘ফিটনেছৰ দিশৰ পৰা আমাৰ খেলুৱৈসকলক সম্পূর্ণ সক্রিয় আৰু উদ্যমী দেখিবলৈ পোৱা গৈছে৷ প্রথমটো অনুশীলন প্রক্রিয়াৰ পৰাই দলৰ প্রতিগৰাকী খেলুৱৈক সুস্থ দেখিছোঁ৷ আই পি এলৰ বাবে তেওঁলোকে উৎকণ্ঠাৰে অপেক্ষা কৰিছে৷
ইতিবাচক দৃষ্টিকোণেৰে প্রতিগৰাকী খেলুৱৈয়ে আই পি এলত উন্নত প্রদর্শনেৰে আৰ চি বিক প্রথমটো খিতাপ উপহাৰ দিয়াৰ লক্ষ্য লৈছে৷’ অধিনায়ক কোহলিয়ে এইদৰে কয়৷ মন কৰিবলগীয়া যে আই পি এলত এইপর্যন্ত এবাৰো খিতাপ জয় কৰিব নোৱাৰা ৰয়েল চেলেঞ্জার্ছ বাংগালুৰুৱে অহা ২১ ছেপ্টেম্বৰত ডুবাইত ছানৰাইজার্ছ হায়দৰাবাদৰ বিৰুদ্ধে এইবাৰৰ আই পি এলত অভিযান আৰম্ভ কৰিব৷