নিয়মীয়া বাৰ্তা, ২০ মাৰ্চঃ আই পি এলৰ পূর্বে ভাৰতীয় মূলৰ প্রেয়সীক জীৱনসংগী কৰি ল’লে ৰয়েল চেলেঞ্জার্ছ বাংগালুৰুৰ অষ্ট্রেলিয়াৰ তাৰকা গ্লেন মেক্সৱেলে৷ মেলব’নত ফার্মাচিষ্ট হিচাপে কর্মৰত ভাৰতীয় মূলৰ যুৱতী ভিনি ৰমণৰ সৈতে তাৰকা অলৰাউণ্ডাৰগৰাকীয়ে যোৱানিশা বিবাহপাশত আবদ্ধ হয়৷ পিতৃৰ কর্মসূত্রে ভিনি ৰমণ শৈশৱৰ পৰা মেলব’নত থাকে৷ তামিল পৰিয়ালৰ যুৱতীগৰাকীৰ সৈতে মেক্সৱেলক ২০১৯ৰ অষ্ট্রেলিয়ান ক্রিকেট ব’ডৰ বঁটা বিতৰণী অনুষ্ঠানত প্রথমবাৰৰ বাবে একেলগে দেখা পোৱা গৈছিল৷ ২০১৭ত ছ’চিয়েল মিডিয়াৰ জৰিয়তে তেওঁলোকৰ প্রেমৰ সম্পর্ক গঢ়ি উঠিছিল৷ ২০২০ৰ ফেব্রুৱাৰীত মেক্সৱেল আৰু ৰমণৰ বাগদানপর্ব সম্পন্ন হৈছিল৷
মন কৰিবলগীয়া যে বিবাহ অনুষ্ঠানৰ বাবে অষ্ট্রেলিয়ান তাৰকাগৰাকীয়ে চলিত পাকিস্তান ভ্রমণৰ পৰা আঁতৰি আছে৷ আই পি এলৰ আৰম্ভণিৰ সময়ছোৱাতো তেওঁক আৰ চি বিৰ জার্ছীত দেখিবলৈ পোৱাৰ সম্ভাৱনা নাই৷ আৰ চি বিয়ে অহা ২৭ মার্চত পঞ্জাব কিংছৰ বিৰুদ্ধে খেলি এইবাৰৰ আই পি এলত অভিযান আৰম্ভ কৰিব৷