বিশেষ বাৰ্তা, ২৫ এপ্ৰিলঃ মৰিয়নিৰ প্ৰায়বোৰ চাহ বাগিচা আৰু গ্ৰামাঞ্চলত চুলাই মদৰ ব্যাপক প্ৰচলনৰ ফলত সৰ্বেত্ৰে তাৰ কুপ্ৰভাৱ পৰা পৰিলক্ষিত হৈছে । এটুপি খোৱা পানীৰ বাবে হাহাকাৰ কৰিবলগীয়া পৰিস্থিতি দেখা দিয়া সময়তো মৰিয়নিৰ গাঁৱে -ভূঞে, নগৰে চহৰে, বাগিছাৰ লাইনে লাইনে উভৈনদী হৈ পৰিছে চুলাই মদ। চুলাই মদৰ গ্রাসত পৰি বহু লোকৰ জীৱনলৈ অমানিশা নামি আহিছে । মদৰ ব্যাপক প্ৰচলনে শৈক্ষিক ,সামাজিক পৰিবেশ বিনষ্ট কৰি পেলাইছে । মদৰ বাবেই বিভিন্ন অপৰাধমূলক ঘটনা সংঘটিত হোৱাও পৰিলক্ষিত হৈছে । কিছু দিন পূৰ্বে নাগিনীজান অঞ্চলত এজন মাতাল স্বামীয়ে মদৰ বাবেই পত্নীক অমানুষিকভাৱে হত্যা কৰিছিল । ইফালে যোৱা নিশাও সংঘটিত হয় আন এক ঘটনাৰ । মদৰ নিচাত মাতাল ব্যক্তিয়ে নিজৰ গৃহত অগ্নি সংযোগ কৰাৰ ফলত সমগ্ৰ ঘৰটো অগ্নিত জাহ যায় । ঘটনাটো মৰিয়নিৰ কাষৰে হাতীজুৰি চাহ বাগিচাৰ । বাগিচাখনৰ নতুন লাইনৰ ৰাজু ৰাও নামৰ সুৰামত্ত লোকজেন পত্নীৰ লগতে পৰিয়ালৰ বাকী সদস্যৰ লগত কাজিয়া লাগি মাৰ ধৰ কৰি ঘৰৰ পৰা খেদি পঠিয়ায় । ইয়াৰ পিছত মাতাল লোকজনে নিজৰ ঘৰটোত অগ্নি সংযোগ কৰে । অগ্নি সংযোগৰ ফলত ঘৰটো নিমিষতে জ্বলি ছাই হৈ যায়। আনকি ঘটনা সংঘটিত কৰি লোকজনে চুবুৰীয়া এঘৰত গৈ শুই থাকে । এই ঘটনা সংঘটিত হোৱাৰ পিছত হাতীজুৰি চাহ বাগিচাৰ গাঁও ৰক্ষী বাহিনীয়ে মৰিয়নি আৰক্ষীক খবৰ দিয়াত আৰক্ষীয়ে ৰাজুক মৰিয়নি থানালৈ আনে । এই ঘটনাই সমগ্ৰ বাগিচাখনতে চাঞ্চল্যৰ সৃষ্টি কৰিছে । আনহাতে, বাগিচাৰ লগতে গ্ৰামাঞ্চলসমূহত চুলাই মদৰ প্ৰচলনৰ বিৰুদ্ধে উপযুক্ত ব্যৱস্থা হাতত ল’বলৈ প্ৰশাসন, আৰক্ষীৰ প্ৰতি সচেতন ৰাইজে আহ্বান জনাইছে ।
প্ৰেৰক দিব্যজ্যোতি শইকীয়া