নিয়মীয়া বার্তা, ৩মে : সমাগত কাৰ্বি আংলং স্বায়ত্তশাসিত পৰিষদৰ নিৰ্বাচনৰ বাবে শাসকীয় দলে প্ৰচাৰ তীব্ৰতৰ কৰি তুলিছে । মুখ্যমন্ত্ৰী আৰু বিজেপিৰ ৰাজ্যিক সভাপতিয়ে ঠায়ে ঠায়ে প্ৰচাৰ চলোৱাৰ লগতে কেইবাজনো বিধায়কে দলীয় প্ৰাৰ্থীৰ হৈ প্ৰচাৰত নামি পৰিছে । পিছ পৰি ৰোৱা নাই হোজাইৰ বিধায়ক ৰামকৃষ্ণ ঘোষো । আজি তেওঁ পৰিষদৰ ২৬ নং দুৱাৰ বগৰী পৰিষদীয় সমষ্টিৰ প্ৰাৰ্থী ৰিচাৰ্ড থকবিৰ হৈ কেইবাখনো নিৰ্বাচনী প্ৰচাৰ সভাত অংশ গ্ৰহণ কৰাৰ লগতে দলীয় কৰ্মকতা সকলৰ লগত কেইবাখনো বৈঠকত মিলিত হয় । উল্লেখ্য যে, হোজাইৰ বিধায়ক ৰামকৃষ্ণ ঘোষক ৰাজ্যিক বিজেপিয়ে উক্ত সমষ্টিৰ প্ৰভাৰী হিচাপে নিযুক্তি দিছিল । বিধায়ক জনে আজি চলোৱা প্ৰচাৰ অভিযানত জনসাধাৰণৰ অভূতপূর্ব সঁহাৰি জনায় । বিধায়ক তথা দলীয় প্ৰভাৰী জনে বিজেপি চৰকাৰে বিগত সময়ত কৰা আৰু আগলৈ কৰা পৰিকল্পনাৰ অৰ্থে কার্বি আংলঙৰ দ্রুত উন্নয়নৰ স্বার্থত এই সমষ্টিত দলৰ প্ৰাৰ্থী গৰাকীক বিপুল ভোটেৰে জয়লাভ কৰিব বুলি আশাবাদী । উল্লেখযোগ্য যে, বিজেপি দলৰ বৰ্তমানৰ প্ৰাৰ্থী জন পৰিষদৰ বিগত কৰ্যকালত এগৰাকী নিৰ্দলীয় হিচাপে জয়যুক্ত হৈ পিছত বিজেপি দলত যোগদান কৰি এইবাৰ দলীয় প্ৰাৰ্থী হয়।
প্ৰেৰক কিশলয় দেৱগোস্বামী