অসমীয়া ভাষাই ধ্রুপদী ভাষাৰ স্বীকৃতি পোৱাৰ লগে লগেই ভাষাটিৰ বিকাশৰ বাবে আৰম্ভ হোৱা বিভিন্ন চিন্তা–চর্চা অতি উৎসাহজনক৷ এনে ধৰণৰ বিভিন্ন অনুশীলনে ভাষাটিৰ বিকাশত সহায় কৰাটো স্বাভাৱিক কথা৷ কিন্তু এটা কথা মনত ৰাখিব লাগিব যে ভাষা এটিৰ বিকাশৰ বাবে যিখন বাহনৰ প্রয়োজন হয়, সেই বাহনখনৰ চৰিত্রৰ লগত খাপ খুৱাই থাকিব পাৰিলেহে ভাষা–সাহিত্যৰ বিকাশ সম্ভৱ হ’ব৷ এটা সময়ত ছপা মাধ্যমেই আছিল ভাষাৰ প্রধান বাহক৷ অনাতাঁৰ মাধ্যম অহাৰ পাছত কথাবোৰ কিছু সলনি হ’বলৈ ধৰে৷ আজিৰ প্রজন্মৰ মাজত অতি জনপ্রিয় হৈ উঠা ডিজিটেল পৃথিৱীখনতো অসমীয়া ভাষাৰ প্রৱেশ আৰু গৌৰৱময় উপস্থিতি জৰুৰী হৈ পৰিছে৷ ছপা মাধ্যমৰ প্রতি অত্যধিক আৱেগপূর্ণ মায়া–মমতা আৰু একে সময়তে ডিজিটেল মাধ্যমৰ প্রতি প্রদর্শন কৰা অনীহাও একধৰণৰ সমস্যা হৈ থিয় দিছে৷ প্রযুক্তিবিদ্যাই আনি দিয়া নতুন সুবিধাবোৰৰ প্রতি এচাম মানুহ অজ্ঞতাজনিত কাৰণত বিৰোধী হৈ থিয় দিয়ে৷ ছপা যন্ত্র অহাৰ পাছতো মানুহে হাতেৰেই হস্তনির্মিত কাগজত লিখি থাকিলে ভাষা–সাহিত্যৰ বিকাশ সম্ভৱ নহ’লহেঁতেন৷ এতিয়া ডিজিটেল মাধ্যমৰ ক্ষেত্রতো একে কথাৰে পুনৰাবৃত্তি হ’বলৈ ওলাইছে৷ কিন্তু এটা কথা ঠিক যে ডিজিটেল ক্ষেত্রখনত অসমীয়া ভাষা সংৰক্ষণ আৰু প্রচাৰৰ বাবে অসমীয়া ডিজিটেল বিষয়বস্তুৰ প্রয়োগ অতি গুৰুত্বপূর্ণ৷ ডিজিটেল বিষয়বস্তুই আখৰৰ লগতে শব্দ আৰু ছবিকো সমানেই গুৰুত্ব দিয়ে৷ ব্লগ, ভিডি’, প’ডকাষ্ট, হ–বুক আৰু অনলাহন বাতৰি কাকত, আলোচনী, বিভিন্ন এপযোগে পঢ়িব পৰা লেখা আদিৰ দৰে বিভিন্ন প্লেটফর্মে অসমীয়া ভাষাটোক সহজেই পাঠকৰ ওচৰলৈ নিব পাৰে৷ এনে ধৰণৰ প্লেটফর্মত থকা অসমীয়া ভাষাৰ কথাই বর্তমানৰ টেক–চেভি প্রজন্মক খাদ্যৰ যোগান ধৰিব পাৰে৷ হ–বুকে অসমীয়া সাহিত্যক বিশ্বব্যাপী দর্শকৰ বাবে সুলভ কৰি তুলিব পাৰে আৰু অসমীয়া ভাষা আৰু সাহিত্যৰ অস্তিত্ব নিশ্চিত কৰিব পাৰে৷ এনেদৰেই অসমীয়াক বিশ্বব্যাপী ডিজিটেল পৰিৱেশতন্ত্রৰ এক সজীৱ অংশ হিচাপে গঢ়ি পৰা যাব৷
ডিজিটেল যুগত প্রাসংগিক হৈ থাকিবলৈ অসমীয়াই প্রযুক্তিগত পৰিৱেশত স্থান অধিকাৰ কৰিবই লাগিব৷ ছফ্টৱেৰ, ম’বাইল অপাৰেটিং ছিষ্টেম আৰু স্মার্ট ডিভাইচৰ বাবে অসমীয়া ভাষাৰ ব্যৱহাৰযোগ্য ৰূপ এটিৰ বিকাশ সাধন কৰাটো অতি প্রয়োজনীয়৷ অসমীয়া লিপিৰ ম’বাইল কী–বর্ডে ব্যৱহাৰকাৰীৰ যোগাযোগ সহজ কৰি তুলিব পাৰে৷ এলেক্সা আৰু গুগল এছিছটেণ্টৰ দৰে স্মার্ট এছিছটেণ্টে অসমীয়া আদেশ সমর্থন কৰিব লাগে আৰু এই ভাষাৰ ব্যৱহাৰকাৰীসকলৰ্ বাবে ব্যৱহাৰযোগ্যতা বৃদ্ধি কৰিব লাগে৷ টেকনিকেল কোম্পানীসমূহক তেওঁলোকৰ স্থানীয়কৰণৰ প্রচেষ্টাত অসমীয়াক অন্তর্ভুক্ত কৰিবলৈ উৎসাহিত কৰিব লাগিব, যাতে এপ আৰু ডিভাইচসমূহে অসমীয়াভাষী ব্যৱহাৰকাৰীসকলক্ উৎসাহিত কৰে৷ ছ’চিয়েল মিডিয়া প্লেটফর্মবোৰো অসমীয়া ভাষাৰ প্রচাৰৰ বাবে শক্তিশালী আহিলা হিচাপে বিবেচিত হ’ব পাৰে৷ ব্যক্তি, প্রভাৱশালী সংগঠনক ফেচবুক, ইনষ্টাগ্রাম, টুইটাৰৰ দৰে প্লেটফর্মত অসমীয়া ব্যৱহাৰ কৰিবলৈ উৎসাহিত কৰিলে ভাষাটোক অধিক দৃশ্যমান আৰু নতুন প্রজন্মৰ দর্শকৰ বাবে আকর্ষণীয় কৰি তুলিব পৰা যাব৷ অসমীয়া পৰম্পৰা, সাহিত্য, উৎসৱৰ প্রচাৰৰ অনলাইন প্রত্যাহ্বান, প্রতিযোগিতা, অভিযানে ব্যৱহাৰকাৰীক অধিক আকর্ষিত কৰিব পাৰে৷ দৈনন্দিন ছ’চিয়েল মিডিয়াৰ আদান–প্রদানৰ অংশ হিচাপে ব্যৱহাৰ কৰি অসমীয়া ভাষাক ডিজিটেল যুগত এক গতিশীল ৰূপ দিব পৰা যায়৷ অসমীয়া সাহিত্যৰ অন্ততঃ কপিৰাইটৰ আওতাত নথকাখিনিক ডিজিটাইজ কৰি ভাষাটোৰ চহকী সাহিত্যিক ঐতিহ্য সংৰক্ষণৰ এক গুৰুত্বপূর্ণ পদক্ষেপ হিচাপে গ্রহণ কৰিব পাৰি৷ ৰচনাসমূহ ডিজিটেল ফর্মেটলৈ ৰূপান্তৰিত কৰি ৱেবছাইট আৰু ম’বাইল এপ্লিকেচনৰ জৰিয়তে সকলোৰে বাবে সুলভ কৰি তুলিব লাগে৷ কিন্তু এই কাম অতি ব্যয়বহুল৷ ব্যক্তিগত প্রচেষ্টাত দুই–একে এনে কাম দায়িত্বসহকাৰে কৰি আছে যদিও চৰকাৰী দায়িত্ব অবিহনে এনে ব্যয়বহুল কাম সঠিক গতিত আগবাঢ়িব নোৱাৰে৷ অসম চৰকাৰে অসমীয়া ভাষাৰ আখৰৰ ইউনিকোড সংস্কৰণ প্রস্তুত কৰিছিল৷ সেই আখৰবোৰৰ বিকাশৰ কামেৰে এই বিশাল কর্মযজ্ঞৰ শুভাৰম্ভ কৰিব পৰা যায়৷