নিয়মীয়া বাৰ্তা, ২২ এপ্ৰিলঃ তলাবন্ধৰ প্রতি লক্ষ্য ৰাখি অসংগঠিত শ্রমিকক পাঁচশ টকাকৈ চৰকাৰী সাহায্য প্রদানৰ দাবীত বঙাইগাঁৱত মঙলবাৰে চিটুৰ কর্মীসকলে প্রতিবাদী কার্যসূচী ৰূপায়ণ কৰে৷ বঙাইগাঁৱৰ বিভিন্ন উদ্যোগ ক্ষেত্রসমূহৰ সন্মুখত প্লেকার্ড লৈ সীমিতসংখ্যক কর্মীয়ে প্রতিবাদ সাব্যস্ত কৰে৷ চিটুৰ বঙাইগাঁও জিলাৰ সভাপতি হৰেশ্বৰ দাসে এক বিবৃতিত এই কথা জানিবলৈ দি কয় যে তলাবন্ধৰ ফলত ঘৰত আবদ্ধ হৈ থাকিবলগীয়া হোৱাত শ্রমিকৰ পৰিয়ালে অতি কষ্টৰে দিন অতিবাহিত কৰিবলগীয়া হৈছে৷ কেন্দ্র আৰু ৰাজ্য চৰকাৰে সদম্ভে ঘোষণাৰ পিছতো কাৰখানাসমূহৰ মালিকে কর্মহীন শ্রমিকক দৰমহা আদায় দিয়া নাই৷ একেদৰে অটো, ই–ৰিক্সা তথা দৈনিক হাজিৰা কৰি পেট প্রৱর্তোৱা শ্রমিকসকলে দীর্ঘদিনে আয়ৰ পৰা বঞ্চিত হৈ আছে৷ এনে ক্ষেত্রত এইসকল শ্রমিকক চৰকাৰী সাহায্য প্রদান কৰিবলৈ সংগঠনটোৱে আহ্বান জনায়৷ এই প্রতিবাদী কার্যসূচী বঙাইগাঁও শোধনাগাৰৰ লগতে মাণিকপুৰ, বিজনীতো ৰূপায়ণ কৰা হয়৷