নিয়মীয়া বাৰ্তা, ১২ ডিচেম্বৰঃ বিদেশীমুক্ত অসম গঢ়াৰ লক্ষ্যৰে ১৬ কোটি টকা ব্যয়েৰে সম্পন্ন কৰা নাগৰিকপঞ্জী (এন আৰ চি) উন্নীতকৰণ প্রক্রিয়াত ৰৈ যোৱা এটাৰ পাছত আন এটা আসোঁৱাহ পোহৰলৈ আহিছে৷ দীঘলীয়া প্রক্রিয়াৰ মাজেৰে এন আৰ চি উন্নীতকৰণ কৰা হ’ল যদিও নথি–পত্র পৰীক্ষণেই হওক অথবা এন আৰ চিত নাম অন্তর্ভুক্তিৰ বাবে যোগ্যজন বাছি উলিওৱাৰ ক্ষেত্রত কিছু বিসংগতি ৰৈ গ’ল৷ শেহতীয়াকৈ গুৱাহাটী উচ্চ ন্যায়ালয়ত এন আৰ চিৰ ৰাজ্যিক সমন্বয়কে দাখিল কৰা এখন শপতনামাত এনে বহু বিস্ফোৰক তথ্য পোহৰলৈ আহিছে৷ বিশেষকৈ বেক–এণ্ড ভেৰিফিকেচন অবিহনে ১৮,৯৬,৬৯৮গৰাকী লোকৰ নাম এন আৰ চিত সন্নিৱিষ্ট হোৱা বুলি শপতনামাখনত উল্লেখ কৰা হৈছে৷ অর্থাৎ পর্যাপ্ত নথি–পত্র, উপযুক্ত তথ্যপাতি অবিহনে এই লোকসকলৰ নাম সন্নিৱিষ্ট হৈছে নাগৰিকপঞ্জীত৷ এয়া কিদৰে হ’বলৈ পালে, তাৰ তথ্যও উল্লেখ কৰা হৈছে শপতনামাখনত৷ সেই অনুসৰি এন আৰ চিৰ বাবে দাখিল কৰা নথি–পত্র সঠিক পৰীক্ষণৰ বাবে গ্রহণ কৰা হৈছিল বেক–এণ্ড ভেৰিফিকেচন৷ অর্থাৎ দাখিল কৰা নথি–পত্রসমূহ যি কর্তৃপক্ষই প্রদান কৰিছিল, সেই কর্তৃপক্ষৰ ওচৰলৈ সেইসমূহ প্রকৃত নথি–পত্র হয় নে নহয়, সেয়া প্রমাণ কৰাৰ বাবে প্রেৰণ কৰাৰ প্রক্রিয়াই হৈছে বেক–এণ্ড ভেৰিফিকেচন৷ আৰম্ভণিতে এই প্রক্রিয়াৰেই যোগ্য, অযোগ্য বিবেচনা কৰা হৈছিল৷ কিন্তু ২০১৭ চনৰ ডিচেম্বৰত এই প্রক্রিয়া বন্ধ কৰা হয়৷ ইয়াৰ পৰিৱর্তে নথি–পত্র পৰীক্ষণৰ বাবে গঠন কৰা হয় জিলা দণ্ডাধীশ তদন্তকাৰী গোট (ডি এম আই টি)৷ এই গোটসমূহক নথি–পত্রসমূহ পৰীক্ষা কৰি সেইসমূহ প্রকৃত হয় নে নহয়, সেয়া নির্ধাৰণ কৰাৰ কর্তৃত্ব প্রদান কৰা হয়৷ বেক–এণ্ড ভেৰিফিকেচনৰ সময়ত প্রায় ৬.৫ কোটি নথি–পত্র সশ্লিষ্ট কর্তৃপক্ষলৈ প্রেৰণ কৰা হৈছিল৷ কিন্তু সময়ত আটাইবোৰ নথি–পত্র লাভ কৰাটো সম্ভৱ নহ’ল৷ ডিএমআইটি এলআৰচিআৰ আৰু কেইগৰাকীমান দ্বিতীয় আৰু তৃতীয় গ্রেডৰ বিষয়াৰে গঠন কৰা হয়৷ তেওঁলোকে বেক–এণ্ড ভেৰিফিকেচন নোহোৱা অথবা বেক–এণ্ড ভেৰিফিকেচনত গ্রহণযোগ্য নহয় বুলি অহা নথি–পত্রসমূহ পৰীক্ষণ কৰে৷ এই গোটটোৱে ঘৰে ঘৰে গৈ নথি–পত্র পৰীক্ষণৰ ব্যৱস্থা কৰে৷ এই পৰীক্ষণত পোৱা ফলাফল লিখিত আকাৰে তেওঁলোকে জমা দিয়াটো উচিত৷ ২০১৭ চনৰ নৱেম্বৰৰ পৰা ২০১৮ চনৰ মে’লৈ ডি এম আই টিয়ে মুঠ ২৪,৮৯,৭৪৫গৰাকী লোকৰ নথি–পত্র পৰীক্ষা কৰে৷ ইয়াৰে ১২,৮৬,০৮৭গৰাকী গ্রহণযোগ্য আৰু ২,১১,১৫৩গৰাকী গ্রহণযোগ্য নহয় বুলি ডি এম আই টিয়ে উল্লেখ কৰে৷ ইয়াৰ বিপৰীতে ১৩,০৩,৬৫৮গৰাকী লোকৰ কোনো ফলাফল তেওঁলোকে প্রকাশ নকৰিলে৷
পৰৱর্তী সময়ত ডি এম আই টিয়ে দ্বিতীয়বাৰৰ বাবে পৰীক্ষণ আৰম্ভ কৰে৷ এই দ্বিতীয় পর্যায়ৰ পৰীক্ষণত এফ আৰ এন এ হিচাপে চিহ্ণিত নথিসমূহৰ পৰীক্ষা কৰা হয়৷ সমান্তৰালভাৱে এন আৰ চি সেৱা কেন্দ্রত শুনানি গ্রহণৰ ব্যৱস্থাও গ্রহণ কৰা হয়৷ ডি আই এম টিৰ দ্বিতীয় পর্যায়ৰ পৰীক্ষণত ১১,৬৩,১২৭গৰাকী লোকক সামৰি লোৱা হয়৷ ইয়াৰে ৬,১০,৬১১গৰাকী লোকক গ্রহণযোগ্য আৰু ৫,৫২,৫১৬গৰাকী লোকক গ্রহণযোগ্য নহয় বুলি চিহ্ণিত কৰা হয়৷ অর্থাৎ ডি এম আই টিৰ প্রথম আৰু দ্বিতীয় পর্যায়ৰ পৰীক্ষণত ১৮,৯৬,৬৯৮গৰাকী লোকে বেক–এণ্ড ভেৰিফিকেচন অথবা প্রাৰম্ভিক পৰীক্ষণত গ্রহণযোগ্য নহয় বুলি বিবেচিত হোৱা সত্ত্বেও এন আৰ চিত নাম সুমুৱাবলৈ সক্ষম হয়৷
লক্ষণীয় যে ডি এম আই টি প্রক্রিয়া সমাপন হোৱাৰ পাছত কিছু নথি–পত্রৰ বেক–এণ্ড ভেৰিফিকেচন লাভ কৰা হৈছিল যদিও সেইসমূহ এন আৰ চিত নাম অন্তর্ভুক্ত কৰাৰ বাবে বিবেচনা কৰা নহ’ল৷ ডি এম আই টিৰ পাছত লাভ কৰা ২,৯১,৬৬৯গৰাকীৰ ফলাফলত ১৭,৯১৬গৰাকী গ্রহণযোগ্য নহয় বুলি কার্যালয় পৰীক্ষণত ধৰা পৰিছিল৷ এই ১৭,৯১৬গৰাকীক ডি এম আই টি দ্বিতীয় পর্যায়ৰ পৰীক্ষণত গ্রহণযোগ্য হিচাপে ধৰা হৈছিল৷ কার্যালয় পৰীক্ষণত গ্রহণযোগ্য নহয় বুলি প্রকাশ হোৱাৰ পাছতো উক্ত ১৭,৯১৬গৰাকী লোকৰ নাম বর্তমানেও অন্তর্ভুক্ত হৈয়ে আছে এন আৰ চিত৷ অর্থাৎ তেওঁলোকৰ নথি–পত্র গ্রহণযোগ্য নাছিল৷ ইয়াৰ পৰাই শংকা কৰা হৈছে যে আবেদনৰ সময়ত প্রদান কৰা নথি–পত্রসমূহৰ বেক–এণ্ড ভেৰিফিকেচন প্রক্রিয়া সম্পূর্ণ কৰিলে আৰু বহু লোক এন আৰ চিত অন্তর্ভুক্তিৰ বাবে অযোগ্য হিচাপে বিবেচিত হ’ব৷ কিন্তু সেই সময়ত তেনে প্রক্রিয়া গ্রহণ নকৰাৰ বাবে এই অযোগ্য লোকসকলৰ নামো অন্তর্ভুক্ত হ’ল জাতিৰ দলিল বুলি আখ্যা দিয়া নাগৰিকপঞ্জীত৷ উল্লেখ্য যে ৰাষ্ট্রীয় নাগৰিকপঞ্জীৰ চূড়ান্ত তালিকা প্রকাশ পোৱাৰ পাছতে বহু সন্দেহজনক লোকৰ নাম অন্তর্ভুক্ত হোৱা বুলি আশংকা কৰা হৈছিল আৰু বহু সময়ত এই আশংকা সত্য বুলি প্রমাণিত হৈছে৷
শেহতীয়াকৈ ৰাজ্যিক সমন্বয়কে শপতনামা দাখিল কৰা গোচৰটোৱেও ইয়াৰ ইংগিত বহন কৰে৷ নলবাৰীৰ ৩নং বিদেশী ন্যায়াধিকৰণে ৰোহিনা খাতুনক বিদেশী ঘোষণা কৰে৷ কিন্তু মহিলাগৰাকীৰ নাম এন আৰ চিত অন্তর্ভুক্ত হয়৷ অর্থাৎ নথি পৰীক্ষণৰ সময়ত মহিলাগৰাকীৰ বিৰুদ্ধে ৩নং নলবাৰী বিদেশী ন্যায়াধিকৰণে ৰুজু হৈ থকা গোচৰ সন্দর্ভত পৰীক্ষণকাৰী বিষয়াই বিবেচনা নকৰিলে৷ ফলত তেওঁৰ নাম এন আৰ চিত অন্তর্ভুক্ত হ’ল৷ শপতনামাত উল্লেখ কৰা অনুসৰি ৰোহিমা খাতুনৰ নাম পৰীক্ষণ বিষয়াৰ ভুলৰ বাবেই অন্তর্ভুক্ত হ’ল৷ সময়ে সময়ে বিদেশী ন্যায়াধিকৰণত ৰুজু হৈ থকা গোচৰৰ তথ্য জিলা উপায়ুক্তক প্রদান কৰা হৈছিল৷ তৎসত্ত্বেও একাংশ বিষয়াই এই নথি–পত্র বিবেচনাৰ বাবে গ্রহণ নকৰিলে৷ অনুৰূপ ধৰণে যোৰহাটৰ মেছেৰ আলী বিদেশী ঘোষিত হোৱাৰ পাছতো তেওঁৰ নাম সন্নিৱিষ্ট হৈছে এন আৰ চিত৷ এই গোচৰ দুটা সন্দর্ভত ৰাজ্যিক সমন্বয়কে দাখিল কৰা শপতনামাত উল্লেখ কৰা অনুসৰি প্রকৃত বাসিন্দা (অ’ আই) হিচাপেও নাম অন্তর্ভুক্তিৰ ক্ষেত্রত ৰৈ গৈছে যথেষ্ট আসোঁৱাহ৷
সেই অনুসৰি ছমৰীয়া, লাহৰীঘাট, ধিং আদি স্থানত অ’ আই হিচাপে নাম অন্তর্ভুক্ত হৈছে অযোগ্য লোকৰ৷ সেইদৰে বংশবৃক্ষ পৰীক্ষণৰ ক্ষেত্রতো যথেষ্ট আসোঁৱাহ ৰৈ গৈছে এন আৰ চি উন্নীতকৰণৰ সময়ত৷ এই আসোঁৱাহ পৰীক্ষাৰ বাবেও পৰৱর্তী সময়ত কেইটামান নমুনা পৰীক্ষা কৰিছিল এন আৰ চি কর্তৃপক্ষই৷ শপতনামাত উল্লেখ কৰা অনুসৰি বাঘবৰ, কলগাছিয়া আৰু দলগাঁও এন আৰ চি সেৱা কেন্দ্রত পৰীক্ষা কৰা হৈছিল লিগেচী ডাটা কোড৷ এই পৰীক্ষণত পোহৰলৈ অহা তথ্য অনুসৰি উক্ত তিনিটা এন আৰ চি সেৱা কেন্দ্রত ২,৩৪৬টা লিগেচী ডাটা কোড পৰীক্ষা কৰা হৈছিল৷ ইয়াৰ ভিতৰত ৯৪৩টা নাম ভুল বংশবৃক্ষৰ জৰিয়তে এন আৰ চিত অন্তর্ভুক্ত হোৱাৰ তথ্য পোহৰলৈ আহে৷ অর্থাৎ উক্ত তিনিটা এন আৰ চি সেৱা কেন্দ্রত ৪০ শতাংশ লোক ভুল বংশবৃক্ষৰ জৰিয়তে নাম অন্তর্ভুক্ত কৰিছিল নাগৰিকপঞ্জীত৷ প্রসংগক্রমে উল্লেখ কৰিব পাৰি যে ৰাজ্যত ব্যৱহাৰ কৰা মুঠ লিগেচী ডাটা কোডৰ সংখ্যা হৈছে ৩৯,২৯,৭০৩টা৷ অর্থাৎ এই বৃহৎ পৰিমাণৰ লিগেচী ডাটা কোডৰ ক্ষেত্রতো আসোঁৱাহ ৰৈ যোৱাৰ সম্ভাৱনাই অধিক৷ এনে ক্ষেত্রত ৰাজকোষৰ বৃহৎ পৰিমাণৰ ধন ব্যয়েৰে সম্পূর্ণ কৰা এন আৰ চি প্রক্রিয়াৰ গ্রহণযোগ্যতাক লৈ পুনৰ এবাৰ উত্থাপন হৈছে প্রশ্ন৷