বিশ্বৰ দুই শীর্ষস্থানীয় পুথিভঁৰালত স্থান নগাঁৱৰ কৃতী সন্তান প্রয়াগ শইকীয়াৰ পাঁচখন গ্রন্থ

নিয়মীয়া বাৰ্তা ২২ জানুৱাৰীঃ অসমীয়া কাব্যজগতৰ বাবে এটা শুভ সংবাদ৷ নিজৰ কাব্যিক প্রতিভাৰে উজলি উঠা নগঞাবাসী সাহিত্যানুৰাগী লেখক–পাঠকৰ বাবে উৎসাহ কঢ়িয়াই অনা ৰাজ্যখনৰ বিশিষ্ট কবি ডাঃ প্রয়াগ শইকীয়াৰ কাব্যগ্রন্থই বিশ্বৰ অন্যতম গ্রন্থাগাৰ ‘লাইব্রেৰী অৱ কংগ্রেছ’ আৰু ‘ৰাছিয়ান ষ্টেট লাইব্রেৰী’ত স্থান লাভ কৰিছে৷ উল্লেখ্য যে কবি ডাঃ প্রয়াগ শইকীয়াৰ পাঁচখনকৈ কাব্যপুথি এতিয়াৰে পৰা আমেৰিকাৰ ৱাশ্বিংটন ডিচিত অৱস্থিত ‘লাইব্রেৰী অৱ কংগ্রেছ’ আৰু ৰাছিয়াৰ মস্কোত অৱস্থিত ‘ৰাছিয়ান ষ্টেট লাইব্রেৰী’ত উপলব্ধ হোৱাৰ লগতে পৃথিৱীৰ বিভিন্ন প্রান্তৰ কাব্যপ্রেমীয়ে যশস্বী কবিগৰাকীৰ কাব্যিক সৌন্দর্য পঠনৰ জৰিয়তে উপলব্ধি কৰিবলৈ সক্ষম হ’ব৷ অতিমাৰীৰ দৰে এক ভয়াৱহ পৰিস্থিতিত কবি ডাঃ প্রয়াগ শইকীয়াৰ চাৰিখনকৈ অনূদিত গ্রন্থ আৰু এখন মৌলিক ইংৰাজী গ্রন্থ আমাজন কিন্দল পাব্লিকেচনে প্রকাশ কৰি কবিগৰাকীৰ সৃষ্টি প্রতিভাক সন্মান জনাইছে৷ তদুপৰি অসমৰ বৌদ্ধিক সমাজখনলৈও এক আশাৰ বার্তা বোৱাই আনিলে৷ এই চাৰিখন গ্রন্থ হ’ল ক্রমে‘The sun and Shadows,’ ‘Speaking Pictures and Silent Poetry’, Void of my father and other sliees of life’, ‘Poetry in three Baskets আৰুBlue Brook৷ এই গ্রন্থকেইখনৰ ভিতৰত সদ্যৱসৰপ্রাপ্ত অধ্যক্ষ তথা বিশিষ্ট গীটাৰবাদক কৃষ্ণ দুলাল বৰুৱাই কবি শইকীয়াৰ গদ্য আৰু কাব্য সমৃদ্ধThe Sun and Shadowsৰ ইংৰাজীলৈ তর্জমা কৰাৰ লগতে কাব্যগ্রন্থখনৰ বেটুপাত অংকন কৰিছে প্রতিষ্ঠিত চিত্রশিল্পী পল্লৱী শর্মাই৷ আন তিনিখন গ্রন্থ বিশিষ্ট অনুবাদক বিবেকানন্দ চৌধুৰীয়ে অনুবাদ কৰিছে৷

ইয়াৰেSpeaking picture and silent poetry শীর্ষক গ্রন্থখনৰ বাবে কবি শইকীয়াই অসম সাহিত্য সভাৰ কলাগুৰু বিষ্ণুপ্রসাদ বঁটা লাভ কৰে৷ কাব্যগ্রন্থখনৰ বেটুপাত গুৰুজনাৰ বৃন্দাবনী বস্ত্রৰে সমৃদ্ধ৷Void of my father and other sliees of my life উপন্যাসৰ সৈতে কেইটিমান গল্পৰ অনুবাদ এই গ্রন্থখন প্রখ্যাত আলোকচিত্র শিল্পী ডাঃ পার্থ সাৰথি বৰুৱাই কবি প্রয়াগ শইকীয়াৰ পৈতৃক গৃহৰ ছবিৰে বেটুপাত সমৃদ্ধ কৰাৰ বিপৰীতেPoetry in three Baskets নামৰ এইখন গ্রন্থত কবিগৰাকীৰ তিনিখনকৈ কবিতাৰ সংকলন থূপাই অনুবাদ কৰা কাব্যগ্রন্থখনৰ বেটুপাত প্রখ্যাত চিত্রশিল্পী প্রণৱ বৰুৱাই অংকন কৰাৰ উপৰি কবি শইকীয়াৰ মৌলিক সৃষ্টিBlue Brook শীর্ষক গ্রন্থখনতো বিখ্যাত চিত্রশিল্পী প্রণৱ বৰুৱাই বেটুপাত অংকন কৰিছে৷ আনহাতে অসমীয়া সাহিত্যৰ ভঁৰাললৈ কবি ডাঃ প্রয়াগ শইকীয়াই আগবঢ়োৱা অনবদ্য নৈবেদ্যক প্রকৃত মান্যতা প্রদানেৰে উল্লিখিত গ্রন্থকেইখনক লাইব্রেৰী অৱ ছায়েঞ্চে ইতিমধ্যে গ্রহণ কৰাৰ স্বীকৃতি দি ৰাছিয়ান ষ্টেট লাইব্রেৰীয়ে কবি ডাঃ প্রয়াগ শইকীয়াক আনুষ্ঠানিকভাৱে অৱগত কৰোৱা এই শুভ সংবাদ বিয়পি পৰাৰ লগে লগে নগাঁৱৰ সাহিত্য জগতত সৃষ্টি হৈছে পাৰভঙা উছাহ৷ ‘বতাহ চ’ৰা বাটত’খ্যাত সুবৃহৎ গ্রন্থৰ প্রণেতা কবি শইকীয়াক এই সন্দর্ভত সোধা এটা প্রশ্ণোত্তৰত এই প্রতিবেদকক কয় যে সৃষ্টিশীল কর্ম আঁচনিয়ে যদি দহৰ উপকাৰৰ বাবে বাট কাটে তেতিয়াহ’লে তেনে কর্ম আঁচনিত নিশ্চয় আনন্দ থাকিবই৷ আজি সেই আনন্দৰ সমভাগী হ’বলৈ পাই সুখ পাইছোঁ আৰু পৃথিৱীৰ সবাতোকৈ জনপ্রিয় ১২টা লাইব্রেৰীৰ ভিতৰৰ দুটা লাইব্রেৰীত মোৰ কিতাপে স্থান পোৱাটো পৰম সৌভাগ্য বুলি গণ্য কৰিছোঁ৷ অৱশ্যে এইক্ষেত্রত গ্রন্থৰ অনুবাদকদ্বয়ক ধন্যবাদ জনাবই লাগিব৷ তেওঁলোকৰ সাফল্যই মোক এক মহান অতীতৰ উত্তৰাধিকাৰী কৰি ৰাখিলে বুলি অভিমত প্রকাশ কৰে কবি শইকীয়াই৷