ৰাইজক দেখুৱাই নাটক কৰা মহাজোঁটেই নামিছে হর্ছ ট্রেডিঙত

নিয়মীয়া বাৰ্তা ১৯ এপ্ৰিলঃ বিজেপিয়ে হর্ছ ট্রেডিং কৰিব বুলি ৰাইজক দেখুৱাই ইখনৰ পাছত সিখন নাটক কৰি অহা মহাজোঁট নিজেই নামিছে হর্ছ ট্রেডিঙত৷ ৰাজ্যখনত তিনিটা পর্যায়ত ভোটগ্রহণ শেষ হোৱাৰ পাছতেই বিজেপিয়ে মহাজোঁটৰ প্রার্থীক হর্ছ ট্রেডিং কৰিব বুলি প্রথমতে এ আই ইউ ডি এফৰ প্রার্থীসকলৰ লগতে কংগ্রেছৰো একাংশ প্রার্থীক ৰাজস্থানৰ জয়পুৰলৈ পঠিয়ায়৷ ইয়াৰ কেইদিনমান পাছতেই বি পি এফৰ প্রার্থীসকলকো ছত্তিশগড়লৈ পঠিয়ায়৷ বিজেপিয়ে যাতে তেওঁলোকক হর্ছ ট্রেডিং কৰিব নোৱাৰে, তাৰেই সতর্কতামূলক ব্যৱস্থা হিচাপে মহাজোঁটে এই পদক্ষেপ গ্রহণ কৰে৷ সেইদৰে মহাজোঁটৰ বিগ ব্রাদাৰ কংগ্রেছে কালি দলীয় প্রার্থীসকলৰ সৈতে গুৱাহাটীৰ আজাৰাৰ এখন বিলাসী হোটেলত বৈঠকত মিলিত হৈ দলীয় প্রার্থীসকলক অহা ২২ এপ্রিলৰ পৰা ভোটগণনা পর্যন্ত একেলগে ৰখাৰ সিদ্ধান্ত গ্রহণ কৰে৷

সেই অনুসৰি গুৱাহাটীৰ খানাপাৰাস্থিত গ্রীনউড ৰিজ’ট আৰু তেজপুৰৰ গ্রীনউড হোটেল সাজু কৰি ৰাখিছে৷ গুৱাহাটীকে ধৰি মধ্য অসম আৰু নামনি অসমৰ প্রার্থীসকলক গ্রীনউড ৰিজ’টত আৰু উজনি অসম আৰু উত্তৰ অসমৰ প্রার্থীসকলক তেজপুৰৰ গ্রীনউড হোটেলত ৰাখিব৷ ৰাইজক দেখুৱাই হর্ছ ট্রেডিঙৰ অজুহাতত মহাজোঁটে ইখনৰ পাছত সিখন নাটক কৰি অহাৰ সময়তে স্বয়ং মহাজোঁটেই নামিছে হর্ছ ট্রেডিঙত৷ এ আই ইউ ডি এফৰ সভাপতি বদৰুদ্দিন আজমলৰ পাছত কংগ্রেছ সাংসদ আব্দুল খালেকৰ মন্তব্যতেই প্রকাশ পাইছে মহাজোঁটৰ সেই ভয়ানক পৰিকল্পনাৰ বিষয়৷ উল্লেখ্য যে যোৱা ৯ এপ্রিলত এ আই ইউ ডি এফৰ সভাপতি বদৰুদ্দিন আজমলে সংবাদ মাধ্যমৰ আগত এইবাৰ মহাজোঁটে হর্ছ ট্রেডিং কৰিব বুলি সদম্ভে মন্তব্য কৰে৷

ইয়াৰ কেইদিনমান পাছতেই এ আই ইউ ডি এফৰ সোণাই সমষ্টিৰ প্রার্থী কৰিমুদ্দিন বৰভূঞাই বিজেপিৰ বহু প্রার্থী তেওঁলোকৰ সৈতে যোগাযোগত থকাৰ বিষয়ে সংবাদ মাধ্যমক জানিবলৈ দি অহা ২ মে’ত নির্বাচনী ফলাফল প্রকাশৰ পাছতেই তেওঁলোক মহাজোঁটলৈ আহিব বুলি প্রকাশ কৰে৷

আজমলৰ পাছত  বৰপেটাৰ কংগ্রেছ সাংসদ আব্দুল খালেকে ‘নিয়মীয়া বার্তা’ৰ আগত মিত্রজোঁটৰ একাংশ প্রার্থীৰ সৈতে মহাজোঁটৰ যোগাযোগ চলি আছে বুলি জানিবলৈ দিয়ে৷ এই সম্পর্কত সাংসদ খালেকে কয়– ‘অগপ আৰু ইউ পি পি এলৰ প্রার্থীও আমাৰ লগত যোগাযোগত আছে৷’ অৱশ্যে তেওঁ অগপ আৰু ইউ পি পি এলৰ কোন কোন প্রার্থী তেওঁৰ সৈতে যোগাযোগত আছে, সেই বিষয়ে বিশেষ তথ্য দিবলৈ অস্বীকাৰ কৰে৷ ইউ পি পি এলৰ প্রসংগত তেওঁ আৰু কয় যে ইউ পি পি এলে কেইখন আসন লাভ কৰে, তাৰ ওপৰতো বিষয়টো নির্ভৰ কৰিব৷ তদুপৰি বি পি এফ হৈছে কংগ্রেছ নেতৃত্বাধীন মহাজোঁটৰ বিশ্বস্ত সংগী৷ সেয়ে বি পি এফে বেয়া পোৱা কামো তেওঁলোকে কৰিব নোৱাৰে৷

আনহাতে, অসম জাতীয় পৰিষদ আৰু ৰাইজৰ দলৰ একাংশ প্রার্থীৰ সৈতে তেওঁৰ যোগাযোগ চলি থকাৰ বিষয়ে জানিবলৈ দি কয় যে তেওঁ নিজেই দল দুটাৰ দুই–এজন প্রার্থীৰ লগত নিয়মিত কথা–বতৰা পাতি আছে৷ তেওঁলোকে যদি মহাজোঁটৰ চৰকাৰত যোগ দিব খোজে, তেওঁলোকৰ বাবে মহাজোঁটৰ দুৱাৰ খোলা থাকিব৷ সাংসদ খালেকৰ সেই ভাষ্যৰ পৰা এটা কথাই স্পষ্ট হৈছে, প্রয়োজনত মিত্রজোঁটত ভাঙোন আনি হ’লেও মহাজোঁটে এইবাৰ চৰকাৰ গঠনৰ বাবে পৰিকল্পনা সাজু কৰি ৰাখিছে৷ যাৰ বাবে মিত্রজোঁটৰ অংশীদাৰ দল অগপ, ইউ পি পি এলৰ প্রার্থীৰ সৈতেও নির্বাচনী ফলাফল প্রকাশৰ পূর্বেই তেওঁলোকে যোগাযোগ ৰক্ষা কৰি চলিছে৷ মুঠতে বিজেপিয়ে হর্ছ ট্রেডিং কৰি চৰকাৰ কৰিব পাৰে বুলি ৰাইজক দেখুৱাই ইখনৰ পাছত সিখন নাটক কৰি অহা মহাজোঁটৰ বিগ ব্রাদাৰ কংগ্রেছ আৰু ছেকেণ্ড বিগ ব্রাদাৰ এ আই ইউ ডি এফে ভোটগণনাৰ পূর্বেই হর্ছ ট্রেডিঙৰ চিকাৰত নামি পৰিছে৷

অৱশ্যে এই হর্ছ ট্রেডিং কিমান দূৰ সফল হয়, সেয়া অহা দুই মে’ৰ নির্বাচনী ফলাফলৰ পাছতহে স্পষ্ট হ’ব৷ কিয়নো এ আই ইউ ডি এফ আৰু কংগ্রেছে যোগাযোগ অব্যাহত ৰখা বিজেপি, অগপ, ইউ পি পি এলৰ প্রার্থীসকল জয়লাভ কৰিলেহে তেওঁলোকৰ অভিযানে সফলতা লাভ কৰিব৷