নিয়মীয়া বাৰ্তা ৩০ ডিচেম্বৰঃ ঘৰুৱা দল দক্ষিণ আফ্রিকাৰ বিপক্ষে চেঞ্চুৰিয়নত খেলি থকা প্রথমখন টেষ্টত জয়ৰ দিশে অগ্রসৰ হৈছে বিৰাট কোহলি নেতৃত্বাধীন টীম ইণ্ডিয়া৷ টেষ্টখনত ভাৰতীয় দলটোৱে জয়ৰ বাবে বান্ধি দিয়া ৩০৫ ৰানৰ লক্ষ্য অনুসৰণ কৰিবলৈ আহি শ’লঠেকত পৰিছে প্রটিয়াজ বাহিনী৷ বুধবাৰে চতুর্থ দিনৰ খেলৰ অন্তলৈকে ঘৰুৱা দলটোৱে চাৰিটা উইকেট হেৰুৱাই মাত্র ৯৪ ৰান সংগ্রহ কৰিছে৷ দিনান্তত অধিনায়ক ডীন এলগাৰে ৫২ ৰান কৰি ক্রিজত আছে৷ হাতত সম্পূর্ণ এটা দিন আৰু ৬টা উইকেট বাকী থকা অৱস্থাত টেষ্টখনত দক্ষিণ আফ্রিকাক জয়ৰ বাবে এতিয়াও ২১১ ৰানৰ প্রয়োজন৷ ঘৰুৱা দল দক্ষিণ আফ্রিকাৰ ইনিংছ মুকলি সুখকৰ নাছিল৷ দলীয় স্ক’ৰ ১ ৰানতে তাৰকা বেটছমেন মার্কৰামে ১ ৰান কৰি পেভিলিয়নমুখী হয়৷ মার্কৰাম আউট হোৱাৰ কিছুসময় পিছতে কিগান পিটাৰছেন আৰু ৰাছি ভান ডাৰ ডুছেনে বিদায় লোৱাত দক্ষিণ আফ্রিকা চৰম বিপর্যয়ত পৰে৷ পিটাৰছেনে ১৭ আৰু ডুছেনে মাত্র ১১ ৰান কৰি বিদায় লয়৷
ইফালে নাইট ৱাটছমেন হিচাপে ক্রিজলৈ অহা কেশৱ মহাৰাজেও বিশেষ অৰিহণা আগবঢ়োৱাত ব্যর্থ হয় আৰু মাত্র ৮ ৰান কৰি বুমৰাহৰ বলত ব’ল্ড হয়৷ অৱশ্যে এলগাৰে সুন্দৰ খেল দাঙি ধৰি অর্ধশতক পূর্ণ কৰে৷ ভাৰতীয় দলটোৰ হৈ বুমৰাহে দুটা, ছামি আৰু ছিৰাজ উভয়ে এটাকৈ উইকেট লাভ কৰে৷ ইয়াৰ পূর্বে প্রথম ইনিংছত ১৩০ ৰানৰ গুৰুত্বপূর্ণ অগ্রগতি লাভ কৰা টীম ইণ্ডিয়াই তৃতীয় দিনা ১ উইকেটত কৰা ১৬ ৰানৰ পৰা ইনিংছ মুকলি কৰিবলৈ আহি আজি কাগিছো ৰাবাডা আৰু মার্কো জানছেনৰ চমকপ্রদ বলিঙৰ সন্মুখত বেটিং বিপর্যয় হৈ ১৭৪ ৰানতে দ্বিতীয় ইনিংছ সামৰে৷ ৰাবাডা আৰু জানছেনৰ দুর্দান্ত বলিঙৰ সন্মুখত কোনো এগৰাকী ভাৰতীয় বেটছমেনে ক্রিজত অধিক সময় তিষ্ঠিব নোৱাৰিলে৷
ঋষভ পণ্টে সর্বাধিক ৩৪ ৰানৰ অৰিহণা আগবঢ়ায়৷ আগদিনা ৫ ৰানত বেটিং কৰি থকা অ’পেনাৰ লোকেশ ৰাহুলে আজি বিশেষ উন্নত প্রদর্শন দাঙি ধৰাত ব্যর্থ হয়৷ প্রথম ইনিংছত ১২৩ ৰানৰ দর্শনীয় ইনিংছ খেলা ৰাহুলে দ্বিতীয় ইনিংছত মাত্র ২৩ ৰানৰ অৱদানহে আগবঢ়ায়৷ ইফালে, আগদিনা ৪ ৰান কৰি থকা নাইটৱাটছমেন শার্দূল ঠাকুৰে আজি ১০ ৰান কৰি বিদায় লয়৷ ইফালে শ্বেটেশ্বৰ পূজাৰা, অধিনায়ক বিৰাট কোহলি আৰু আজিংক্য ৰাহানেই দীঘলীয়া ইনিংছ খেলাত ব্যর্থ হয়৷ পূজাৰাই ১৬, কোহলিয়ে ১৮ আৰু ৰাহানেই ২০ ৰান কৰি বিদায় লয়৷ অশ্বিনে ১৪ ৰানৰ অৱদান আগবঢ়ায়৷ দক্ষিণ আফ্রিকাৰ হৈ ৰাবাডা আৰু জানচেন উভয়ে চাৰিটাকৈ উইকেট লাভ কৰাৰ লগতে লুংগি এনগিৰিয়ে দুটা উইকেট লাভ কৰে৷