১৩টাকৈ বঁটাৰে ফিল্মফেয়াৰত উজলিল ‘গল্লীবয়’

নিয়মীয়া বাৰ্তা ১৭ ফেব্ৰুৱাৰীঃ বলীউডৰ তাৰকা–মহাতাৰকাৰ অংশগ্রহণেৰে শনিবাৰে নিশা গুৱাহাটীৰ সৰুসজাই ক্রীড়া প্রকল্পত অনুষ্ঠিত হৈ যায় বর্ণাঢ়্য ফিল্মফেয়াৰ বঁটা প্রদান অনুষ্ঠান৷ ২০১৯ বর্ষত বক্স অফিচত মুক্তি লাভ কৰা ছবিসমূহৰ মাজত বিতৰণ কৰা হয় ফিল্মফেয়াৰ বঁটা৷ কালি ১৩টা বঁটা লাভ কৰি ফিল্মফেয়াৰত উজলি উঠিল বিগত বর্ষটোৰ অন্যতম জনপ্রিয় ছবি ‘গল্লীবয়’–এ৷ শ্রেষ্ঠ ছবি, শ্রেষ্ঠ পৰিচালক, শ্রেষ্ঠ অভিনেতা, শ্রেষ্ঠ অভিনেত্রীকে ধৰি উল্লেখযোগ্য আন কেইবাটাও বঁটা আঁজুৰি আনিবলৈ সক্ষম হয় ছবিখনে৷ সেই অনুসৰি ছবিখনৰ পৰিচালিকা জয়া আখতাৰে লাভ কৰে শ্রেষ্ঠ পৰিচালকৰ সন্মান৷ অৱশ্যে কালিৰ কার্যসূচীত তেওঁ উপস্থিত নথকা বাবে আখতাৰৰ হৈ মঞ্চত বঁটা গ্রহণ কৰে বিশিষ্ট ছবি নির্মাতা কৰণ জোহৰে৷ আনহাতে, ৰণবীৰ সিং আৰু আলিয়া ভাটে ‘গল্লীবয়’ত কৰা অভিনয়ৰ বাবে লাভ কৰে ক্রমে– সর্বশ্রেষ্ঠ অভিনেতা আৰু সর্বশ্রেষ্ঠ অভিনেত্রীৰ সন্মান৷ একেদৰে গালী বয়ত অভিনয় কৰা অম্রুতা সুভাষে লাভ কৰে শ্রেষ্ঠ সহযোগী অভিনেত্রীৰ সন্মান৷ একেখন ছবিৰ বাবে শ্রেষ্ঠ সহযোগী অভিনেতাৰ সন্মান লাভ কৰে সিদ্ধান্ত চতুর্বেদীয়ে৷ ছবিখনে লাভ কৰে শ্রেষ্ঠ মিউজিক এলবাম, শ্রেষ্ঠ গানৰ কথাৰ বঁটাও৷ তদুপৰি গল্লীবয়ৰ বাবে শ্রেষ্ঠ সংলাপৰ সন্মান লাভ কৰে বিজয় মৌর্যই৷ শ্রেষ্ঠ স্ক্রীনপ্লে সন্মান আঁজুৰি আনে গল্লীবয়ৰ বাবে ৰীমা কাগটি আৰু জয়া আখতাৰে৷ ফিল্মফেয়াৰ বঁটা প্রদান অনুষ্ঠানত সমালোচকৰ শ্রেষ্ঠ ছবিৰ সন্মান লাভ কৰে আর্টিকল–১৫ আৰু সোণছিৰিয়াই৷ ভূমি পার্ণেকাৰ আৰু তাপসী পান্নুক ‘ছাণ্ড কী আখ’ নামৰ ছবিখনত অভিনয় কৰাৰ বাবে প্রদান কৰা হয় সমালোচকৰ দৃষ্টি শ্রেষ্ঠ অভিনেত্রীৰ সন্মান৷ একে শিতানত আর্টিকল–১৫ত কৰা অভিনয়ৰ বাবে শ্রেষ্ঠ অভিনেতাৰ সন্মান লাভ কৰে আয়ুস্মান খুৰানাই৷ শ্রেষ্ঠ নেপথ্য শিল্পীৰ বঁটা প্রদান কৰা হয় ক্রমে শিল্পা ৰাও আৰু অৰিজিৎ সিঙক৷ ষ্টুডেণ্ট অৱ দ্য ইয়েৰ টু, পতি পত্নী ঔৰ ৱহ নামৰ ছবিৰ বাবে অনন্যা পাণ্ডেক শ্রেষ্ঠ নৱাগতা অভিনেত্রীৰ সন্মান প্রদান কৰা হয়৷ মর্দ কো দর্দ নেহী হতা ছবিত কৰা অভিনয়ৰ বাবে অভিমন্যু দাছানিক প্রদান কৰা হয় শ্রেষ্ঠ নৱাগত অভিনেতাৰ সন্মান৷ আনহাতে, শ্রেষ্ঠ প্রকৃত কাহিনী শীর্ষক বঁটা আর্টিকল–১৫ ছবিৰ বাবে অনুভৱ সিন্হা আৰু গৌৰৱ ছোলাংকিক প্রদান কৰা হয়৷ ছবিৰ উৎকর্ষ বঁটা প্রদান কৰা হয় অভিনেতা গোবিন্দাক৷ জীৱনজোৰা সাধনা বঁটাৰে সন্মানিত কৰা হয় জ্যেষ্ঠ ছবি নির্মাতা ৰমেশ চিপ্পীক৷ শাশ্বত ছচদেৱক প্রদান কৰা হয় আৰ ডি বর্মন মিউজিক টেলেণ্ট বঁটা৷ উৰি ছবিৰ বাবে আদিত্য ধৰক প্রদান কৰা হয় শ্রেষ্ঠ নৱাগত পৰিচালকৰ বঁটা৷ উল্লেখ্য যে কালি নিশা প্রায় ৮ বজাৰ পৰা অনুষ্ঠিত ফিল্মফেয়াৰ অনুষ্ঠানত ছুপাৰষ্টাৰ অক্ষয় কুমাৰ, মাধুৰী দীক্ষিত, বৰুণ ধাৱান, কার্তিক আৰিয়ান, বিকি কৌশলকে ধৰি কেইবাজনো তাৰকাৰ অনুষ্ঠানে দর্শকক মোহাচ্ছন্ন কৰে৷ এই অনুষ্ঠানত বলীউডৰ জ্যেষ্ঠ আৰু কনিষ্ঠ বহুসংখ্যক তাৰকা উপস্থিত থাকি শোভাবর্ধন কৰে৷