নিয়মীয়া বাৰ্তা, ২১ ডিচেম্বৰঃ সমগ্র উত্তৰ–পূবৰ বাবে ইনাৰ লাইন পার্মিট ব্যৱস্থাৰ বাবে কেন্দ্রীয় চৰকাৰৰ সৈতে আলোচনা কৰিবলৈ মেঘালয়ৰ মুখ্যমন্ত্রী কনৰাড চাংমাক অনুৰোধ জনালে আছাম পাব্লিক ৱর্কছে (এ পি ডব্লিউ) ৷ শুকুৰবাৰে শ্বিলংস্থিত বাসভৱনত মুখ্যমন্ত্রীগৰাকীক সাক্ষাৎ কৰি এখন স্মাৰক–পত্র প্রদান কৰি সংগঠনটোৱে তেওঁৰ লগত শেহতীয়া পৰিস্থিতি সন্দর্ভত এক দীঘলীয়া আলোচনাত মিলিত হয় ৷
এই আলোচনা কালত এ পি ডব্লিউৱে অসমৰ উপকাৰ হোৱাকৈ সমগ্র উত্তৰ–পূবৰ বাবে এখনেই ইনাৰ লাইন পার্মিটৰ ব্যৱস্থা কৰাৰ বাবে কেন্দ্রীয় চৰকাৰৰ সৈতে আলোচনা কৰিবলৈ মুখ্যমন্ত্রীগৰাকীক আহ্বান জনায় ৷ এ পি ডব্লিউৰ সভাপতি অভিজিৎ শর্মাই প্রকাশ কৰা মতে উত্তৰ–পূবৰ ৰাজ্যসমূহে পৃথকে পৃথকে ইনাৰ লাইন পার্মিট ব্যৱস্থা কৰাৰ ফলত অসমৰ বাসিন্দাসকল এই ৰাজ্যসমূহলৈ অহাৰ ক্ষেত্রত অসুবিধাৰ সন্মুখীন হ’ব লগা হয় ৷ বিশেষকৈ বিভিন্ন ব্যৱসায়িক কাৰণত আৰু চাকৰিৰ সূত্রেও মেঘালয়লৈ অসমৰ পৰা নিতৌ বহু লোকৰ অহা–যোৱা হয় ৷ সেয়েহে সমগ্র উত্তৰ–পূবৰ বাবে এখনেই ইনাৰ লাইন পার্মিটৰ ব্যৱস্থাৰ প্রয়োজন ৷
এই আলোচনাত এই বিষয়টো উল্লেখ কৰি মেঘালয়কে ধৰি বাকী উত্তৰ–পূর্বাঞ্চলৰ ৰাজ্যসমূহত প্রয়োজনবশতঃ বর্তমান অৰুণাচল প্রদেশৰ দৰে ৰাজ্যসমূহে নিজা নিজা ইনাৰ লাইন পার্মিটৰ ব্যৱস্থা কৰাৰ বাবে অনুৰোধ জনোৱা হয় মুখ্যমন্ত্রী চাংমাক ৷ এই আলোচনা কালতে উত্তৰ–পূবৰ খিলঞ্জীয়াসকলৰ ভূমিৰ অধিকাৰৰ বিষয়টো কেন্দ্রীয় চৰকাৰৰ ওচৰত উত্থাপন কৰিবলৈও অনুৰোধ জনোৱা হয় ৷ মেঘালয়ৰ মুখ্যমন্ত্রীগৰাকীয়ে বিষয়সমূহ গুৰুত্বসহকাৰে গ্রহণ কৰাৰ লগতে কেন্দ্রীয় চৰকাৰৰ ওচৰত সজোৰে উত্থাপন কৰা হ’ব বুলি আশ্বাস দিয়ে ৷ এ পি ডব্লিউ প্রতিনিধি দলটোত সাধাৰণ সম্পাদক ধ্রুৱজ্যোতি তালুকদাৰ, সাংগঠনিক সম্পাদক ঘনশ্যাম কলিতা আৰু প্রচাৰ সম্পাদক ৰাজীৱ ডেকাও উপস্থিত থাকে ৷