অসম আৰক্ষীত ব্যাপক ৰদবদলঃ তিনিচুকীয়াৰ আৰক্ষী অধীক্ষক দেৱজিৎ দেউৰীক বদলি

নিয়মীয়া বাৰ্তা, ১২ অক্টোবৰঃ ৰাজ্য চৰকাৰৰ গৃহ বিভাগত  এক নির্দেশযোগে অসম আৰক্ষীত ব্যাপক ৰদবদল কৰিছে৷ সেই অনুসৰি ৬খন জিলাৰ আৰক্ষী অধীক্ষকক বদলি কৰা হৈছে৷ গৃহ বিভাগৰ এই নির্দেশনা অনুসৰি হাইলাকান্দিৰ আৰক্ষী অধীক্ষক গৌৰৱ উপাধ্যায়ক অসম আৰক্ষীৰ পুনৰ সংস্থাপন আৰু দুর্নীতি নিবাৰকৰ অধীক্ষক ৰূপে বদলি কৰা হৈছে৷ আনহাতে, কোকৰাঝাৰৰ আৰক্ষী অধীক্ষক থুবেই প্রতীক বিজয় কুমাৰক উত্তৰ গুৱাহাটীৰ মান্দাকাটাৰ কমাণ্ডো বেটেলিয়নৰ অধিনায়ক হিচাপে বদলি কৰা হৈছে৷ তেওঁ বর্তমানৰ অধিনায়ক সঞ্জীৱ কুমাৰ শইকীয়াৰ পৰা দায়িত্ব গ্রহণ কৰিব৷ একেদৰে মৰিগাঁৱৰ আৰক্ষী অধীক্ষক অপর্ণা নটৰাজনক ধুবুৰীৰ আৰক্ষী অধীক্ষক ৰূপে বদলি কৰা হৈছে৷ কার্বি আংলঙৰ আৰক্ষী অধীক্ষক পুষ্পৰাজ সিঙক কোকৰাঝাৰৰ আৰক্ষী অধীক্ষক ৰূপে বদলি কৰা হৈছে৷ ইফালে, ধুবুৰী আৰক্ষী অধীক্ষক গৌৰৱ অভিজিৎ দিলীপক তিনিচুকীয়াৰ আৰক্ষী অধীক্ষক ৰূপে বদলি কৰা হৈছে৷ তিনিচুকীয়াৰ আৰক্ষী অধীক্ষক দেৱজিৎ দেউৰীৰ পৰা তেওঁ এই দায়িত্ব গ্রহণ কৰিব৷ তিনিচুকীয়াৰ আৰক্ষী অধীক্ষক দেৱজিৎ দেউৰীক গুৱাহাটীৰ বশিষ্ঠত থকা এ এফ পি এফৰ কমাণ্ডেণ্ট হিচাপে বদলি কৰা হৈছে৷ গুৱাহাটীৰ ডিচিপি (প্রশাসন) হেমন্ত কুমাৰ দাসক মৰিগাঁৱৰ আৰক্ষী অধীক্ষক হিচাপে বদলি কৰা হৈছে৷ তেওঁ অপর্ণা নটৰাজনৰ পৰা দায়িত্ব চমজি ল’ব৷ একেদৰে গুৱাহাটীৰ পশ্চিম আৰক্ষী জিলাৰ ডিচিপি নৱনিত মহন্তক হাইলাকান্দিৰ আৰক্ষী অধীক্ষক হিচাপে বদলি কৰা হৈছে৷ তেওঁ হাইলাকান্দিৰ বর্তমানৰ আৰক্ষী অধীক্ষক গৌৰৱ উপাধ্যায়ৰ পৰা দায়িত্ব চমজি ল’ব৷ ইফালে, আৰক্ষীৰ বিশেষ শাখাৰ অধীক্ষক শুভাশিস বৰুৱাক গুৱাহাটৰ ডিচিপি (প্রশাসন)লৈ বদলি কৰা হৈছে৷ একেদৰে প্রথম এ এফ পি এফ বেটেলিয়নৰ অধিনায়ক দেৱাশিস বৰুৱাক গুৱাহাটী পশ্চিম আৰক্ষী জিলাৰ ডিচিপি ৰূপে বদলি কৰা হৈছে৷ উত্তৰ গুৱাহাটীৰ মান্দাকাটাৰ বেটেলিয়নৰ অধিনায়ক সঞ্জীৱ কুমাৰ শইকীয়াক কার্বি আংলং জিলাৰ আৰক্ষী অধীক্ষক ৰূপে বদলি কৰা হৈছে৷ তেওঁ জিলাখনৰ বর্তমানৰ আৰক্ষী অধীক্ষক পুষ্পৰাজ সিঙৰ পৰা দায়িত্ব চমজি ল’ব৷