গড়কাপ্টানীৰ অভিযন্তাক প্রহাৰ ক্ষুব্ধ ৰাইজৰ

নিয়মীয়া বার্তা, ১৭ মার্চঃ অধিক ধন লাভৰ লালসাত চৰম অনিয়মেৰে গড়কাপ্টানী পথ নির্মাণক কেন্দ্র কৰি সোমবাৰে সোণাপুৰৰ দন্দৰাল মাৰকাঙত তীব্র উত্তেজনা সৃষ্টি হয় ৷ নিম্নমানৰ পথ নির্মাণৰ প্রতিবাদত ক্ষুণ্ণ ৰাইজে ঠিকাদাৰ–ভিযন্তা মুর্দাবাদ ধ্বনিৰে পৰিৱেশ উত্তাল কৰি তোলে ৷ পথ নির্মাণৰ দায়িত্বত থকা অভিযন্তা উপস্থিত হোৱাৰ লগে লগে উত্তপ্ত পৰিৱেশৰ সৃষ্টি হয় ৷ অভিযন্তাগৰাকীক উত্তেজিত একাংশ লোকে লপাথপা দিয়ে ৷ দুর্নীতি–নিয়মেৰে নির্মাণ কৰি থকা পথটো পুনৰ নতুনকৈ নির্মাণ নকৰা পর্যন্ত কাম বন্ধ কৰি ৰাখিবলৈ ৰাইজে দাবী জনায় ৷ উল্লেখ্য, মেঘালয় সীমান্তৱর্তী মাৰকাং বাৰকাচাৰং অঞ্চলৰ বাসিন্দাসকলে যাতায়াতৰ ক্ষেত্রত যাতনা ভুগি আছিল ৷ ভাৰতে স্বাধীনতা লাভৰ পিছৰে পৰা অঞ্চলবাসীয়ে পথটো নির্মাণৰ বাবে প্রতিখন চৰকাৰৰ মন্ত্রী–বিধায়কক আবেদন–নিবেদন কৰি ভাগৰি পৰিছিল ৷ শেহতীয়াকৈ অঞ্চলটোৰ খিলঞ্জীয়া কার্বি ৰাইজৰ দাবী–অনুৰোধৰ প্রতি সঁহাৰি জনাই এই জৰাজীর্ণ গড়কাপ্টানী পথটো পকীকৰণৰ বাবে ৪ কোটি ১৮ লাখ টকা ধার্য কৰে ৷ ৮.২৫ কিলোমিটাৰ দৈর্ঘ্যৰ পথটো পকীকৰণৰ কথা জানিব পাৰি ৰাইজৰ মুখত হাঁহি বিৰিঙিছিল ৷ কিন্তু ভিতৰুৱা অঞ্চলটোৰ সহজ–সৰল কার্বি ৰাইজক কণা হাঁহক পটান দিয়াৰ দৰে ভাগৱতী উপাধিৰ ঠিকাদাৰজনে চৰম দুর্নীতিৰে পথটো নির্মাণ কৰে ৷ মাটি–বালিৰ ওপৰতে আলকাতৰা নিদিয়াকৈ পকী কৰাত পথটো চপৰাচপৰে এৰি যায়৷ যাৰ বাবে এনে দুর্নীতি কোনো কাৰণতে সহ্য কৰা নহ’ব বুলি স্পষ্ট কৰি দিয়ে৷ দুই–এদিনৰ ভিতৰতে উপায়ুক্ত, মুখ্যমন্ত্রীক পথ নির্মাণৰ দুর্নীতিৰ কথা লিখিতভাৱে অৱগত কৰা হ’ব বুলিও উত্তেজিত ৰাইজে জানিবলৈ দিয়ে৷ আলোচনা নকৰা পর্যন্ত ঠিকাদাৰে কাম কৰিব নোৱাৰিব বুলি ৰাইজে সকীয়াই দিয়ে৷ ইপিনে, পথটোত শিলৰ গুড়ি নিদি পাহাৰৰ ৰঙা মাটি দি পকাৰ কাম কৰাৰো অভিযোগ কৰে স্থানীয় ৰাইজে ৷