নিয়মীয়া বাৰ্তা, ২৫ মেঃ ক’ৰোনা মহামাৰীৰ বিৰুদ্ধে প্রথমশাৰীৰ যোদ্ধা হিচাপে যুঁজ দি অহা চিকিৎসক–চিকিৎসা কর্মীক অসম আৰক্ষীয়ে বর্বৰ নির্যাতন চলোৱাৰ এক ঘটনা সংঘটিত হৈছে চিৰাং জিলাত৷ জিলাখনৰ আমটেঙা ক্ষুদ্র প্রাথমিক চিকিৎসালয়ৰ সন্মুখত আজি সন্ধিয়া স্থানীয় আৰক্ষীয়ে এই অমানৱীয় ঘটনা সংঘটিত কৰে৷ জানিব পৰা মতে, স্বাস্থ্যকেন্দ্রটোৰ চিকিৎসক ডাঃ মাধুর্য কাকতি, ফার্মাচিষ্ট ৰাজু বড়ো আৰু গাণনিক নিতু দাসে সন্ধিয়া প্রায় ৫.৩০ বজাত দিনটোৰ কর্তব্য শেষ কৰি ঘৰলৈ যাবলৈ ওলাইছিল৷ কিন্তু কেন্দ্রটোৰ পৰা ওলাই অহাৰ পাছতে তলাৰ চাবিটো হেৰায়৷ বৰষুণৰ মাজত চিকিৎসকসহ তিনিওগৰাকী লোকে চাবিপাট বিচাৰি আছিল৷
তেনে সময়তে কয়লা ময়লা উপ–আৰক্ষী চকীৰ ভাৰপ্রাপ্ত বিষয়া বিনোদ চৌধুৰীৰ নেতৃত্বত আৰক্ষীৰ এটা দল স্বাস্থ্যকেন্দ্রটোৰ ওচৰত উপস্থিত হয়৷ আৰক্ষীৰ গাড়ী দেখি তেওঁলোক স্বাস্থ্যকেন্দ্রটোৰ ভিতৰলৈ সোমাই যাব বিচাৰে৷ কিন্তু কয়লা ময়লা আৰক্ষী চকীৰ জোৱানে তেওঁলোকৰ বাট ভেটি ধৰে আৰু মুখত কিয় মাস্ক নাই বুলি প্রশ্ণ কৰে৷
তেতিয়া চিকিৎসকগৰাকীয়ে জনায় যে স্বাস্থ্যকেন্দ্রটোৰ চাবিপাট হেৰোৱা বাবে তেওঁলোকে বিচাৰি আছে৷ কিন্তু দৌৰাদৌৰি হোৱা বাবে মাস্ক পিন্ধিবলৈ পাহৰি গ’ল৷ কিন্তু ঘৰলৈ ওভতাৰ পথত মাস্ক পিন্ধি ল’ব৷ আৰক্ষীয়ে চিকিৎসক, চিকিৎসা কর্মীসকলৰ কথা শুনিবলৈ অস্বীকাৰ কৰি তেওঁলোকক ছাতি আঁতৰাই বৰষুণত তিতি কাণত ধৰি উঠা–বহা কৰিবলৈ নির্দেশ দিয়ে৷ লাঠী–বন্দুকধাৰী আৰক্ষীৰ ভাবুকিত ভয় খাই চিকিৎসক–স্বাস্থ্যক নির্দেশ পালন কৰি যায়৷ কিন্তু এইবাৰ হিতাহিত জ্ঞান হেৰুৱাই আৰক্ষীয়ে চিকিৎসক মাধুর্য কাকতি, গাণনিক নিতু দাস আৰু ফার্মাচিষ্ট ৰাজু বড়োক লাঠীৰে উপর্যুপৰি প্রহাৰ কৰে৷ এনেদৰে চিকিৎসক আৰু তেওঁৰ সহযোগীসকলক শাৰীৰিক নির্যাতন চলাই আৰক্ষীৰ দলটো আঁতৰি যায় যদিও আৰক্ষী চকীৰ সন্মুখত পুনৰ খাপ পিটি বহি থাকে৷
ঘটনাৰ পাছত চিকিৎসক–চিকিৎসা কর্মীকেইজন ১০৮ এম্বুলেঞ্চ এখনেৰে উভতিবলৈ লয়৷ কিন্তু পথত আকৌ এবাৰ কয়লা ময়লা উপ–আৰক্ষী চকীৰ জোৱানে তেওঁলোকক আবদ্ধ কৰি অশ্রাব্য গালি–গালাজ কৰে৷ পৰৱর্তী সময়ত পুনৰ আমগুৰি থানাত চিকিৎসক–চিকিৎসা কর্মীসকলক আৰক্ষীয়ে ভেটা দিয়ে আৰু তেওঁলোকক দীর্ঘসময় ধৰি আবদ্ধ কৰি মানসিক নির্যাতন চলায়৷ আৰক্ষীৰ প্রহাৰত আহত হোৱা তিনিওজন লোকক তেনেকৈয়ে থানাত ৰখাই থোৱা হয়৷ এই খবৰ ৰাজহুৱা হোৱাৰ পাছত সাংবাদিকৰ দল এটা থানাত উপস্থিত হোৱাতহে আৰক্ষীয়ে চিকিৎসক মাধুর্য কাকতি আৰু আন দুজন লোকক থানাৰ পৰা যাবলৈ দিয়ে৷ সম্প্রতি কাজলগাঁও অসামৰিক চিকিৎসালয়ত আহত চিকিৎসক আৰু আন দুজন লোকক চিকিৎসা প্রদান কৰি থকা হৈছে৷ চিকিৎসক মাধুর্য কাকতিয়ে পিঠিত আৰু ফার্মাচিষ্ট ৰাজু বড়োৱে আঁঠুত আঘাত পাইছে৷ এই ঘটনাৰ খবৰ ৰাজহুৱা হোৱাৰ পাছতে চিৰাং জিলাৰ লগতে সমগ্র ৰাজ্যত তীব্র প্রতিক্রিয়া সৃষ্টি হৈছে৷ চিকিৎসক–চিকিৎসা কর্মীক প্রহাৰ কৰা আৰক্ষী বিষয়াৰ বিৰুদ্ধে গৃহ বিভাগে এতিয়া কি ব্যৱস্থা গ্রহণ কৰে সেয়া লক্ষণীয় হ’ব৷