নিয়মীয়া বাৰ্তা ২৪ এপ্ৰিলঃ ক’ৰোনা সংক্ৰমণ ৰোধ কৰিবৰ বাবে দেশত লকডাউন হৈ থকাৰ সময়তে তিতাবৰৰ আৰক্ষীয়ে যোৱা নিশাৰ ভাগত এক গোপন সূত্ৰৰ ভিত্তিত দুটা পিষ্টল সহ এজন এন এছ চি এনৰ এৰিয়া কমাণ্ডাৰ গ্ৰেপ্তাৰ কৰে। তিতাবৰ থানাৰ ভাৰাপ্ৰাপ্ত আৰক্ষী বিষয়া মুহিধৰ টায়ে জানিব দিয়া মতে নাগালেণ্ডৰ উষা জিলাৰ মুন গাঁওৰ লেংফুক কন্যাকৰ পুত্ৰ নয়াব’ কন্যাক নামৰ এন এছ চি এনৰ এৰিয়া কামাণ্ডাৰ জনে ২২ আৰু ৩২ দুটা পিষ্টল লৈ ডিমাপুৰৰ পৰা মুককচাং আহি থাকোতে নিশা প্ৰায় ১১ বজাত তিতাবৰ আৰক্ষীয়ে এক গোপন সূত্ৰৰ ভিত্তিত তিতাবৰ ডফলাটিংত উগ্ৰপন্থী জনক গ্ৰেপ্তাৰ কৰে। উগ্ৰপন্থী জনৰ হাতত গুলি সহ এটা মেগজিন সহ দুটা মবাইল ফোন উদ্ধাৰ হয়।
আৰক্ষীয়ে উগ্ৰপন্থী জনক গ্ৰেপ্তাৰ কৰি তদন্ত কৰি আছে। লকডাউনৰ মাজতে চলি থকা অপৰাধ মূলক কাম কাজে চুবুৰীয়া নগা ৰাজ্যৰ ফোঁপোলা স্বৰূপ উদঙাই দিয়াৰ সময়তে তিতাবৰ আৰক্ষীৰ বৃহৎ সফলতাই ৰাইজৰ প্ৰশংসা বুটলিবলৈ সক্ষম হৈছে।