নিয়মীয়া বার্তা, ১৯ এপ্রিলঃ বঙাইগাঁও জিলাৰ কাকৈজানাত শনিবাৰে সন্ধিয়া তীব্রবেগী বাহনৰ খুন্দাত দুটাকৈ দুষ্প্রাপ্য সোণালী বান্দৰৰ মৃত্যুৱে ব্যথিত কৰি তুলিছে স্থানীয় ৰাইজ তথা প্রকৃতিপ্রেমীক ৷ প্রাপ্ত বাতৰি মতে, খাদ্যৰ সন্ধানত কাকৈজানা সংৰক্ষিত বনাঞ্চলৰ পৰা এটা সোণালী বান্দৰৰ জাক নামি আহিছিল কাষৰীয়া গাঁৱলৈ ৷ দলটোৱে ৰাস্তা পাৰ হ’বলৈ লওতে তীব্রবেগী বাহন এখনে খুন্দা মাৰে মাকসহ পোৱালি বান্দৰ এটাক ৷ ঘটনাত থিতাতে নিহত হয় পোৱালি বান্দৰটো ৷ আনহাতে, কিছু সময় পাছতে মাকজনীৰো মৃত্যু হয় ৷ স্থানীয় ৰাইজে দুর্ঘটনা সংঘটিত কৰা বাহনখন জব্দ কৰি আৰক্ষীক চমজাই দিয়ে৷ জব্দকৃত বাহনখনৰ নম্বৰ এএছ–১৯ এইচ্–৯৫৩৫ ৷