নিয়মীয়া বাৰ্তা, ২৩ জানুৱাৰীঃ মৰিগাঁও জিলাৰ লাহৰীঘাট থানাৰ অন্তৰ্গত বৰছলা আৰক্ষী টকীৰ সাপকাটি গাঁৱত যোৱা নিশা হস্তনিৰ্মিত পিষ্টল, এটা সজীৱ গুলী আৰু এখন বিলাসী গাড়ীসহ ছয়জনীয়া যুৱকৰ এটা দলক গ্ৰেপ্তাৰ কৰে আৰক্ষীয়ে । গ্ৰেপ্তাৰ কৰা যুৱককেইজন ক্ৰমে ছেলিমউদ্দিন,ফকৰউদ্দিন,আতিকুল ইছলাম, ছাদ্দাম হুছেইন, মজিবুৰ ৰহমান আৰু মাজৰুল আলম ।
উল্লেখ্য যে নগাঁও জিলাৰ জুৰীয়াৰ এই ছজনীয়া যুৱকৰ দলটোৱে বৰছলা আৰক্ষী চকীৰ অন্তৰ্গত সাপকাটি গাঁৱৰ আৰজ আলীৰ ঘৰলৈ যোৱা নিশা ৯ বজাত আহিছিল । আটকাধীন ছেলিমউদ্দিনৰ পত্নীক পিতৃ গৃহৰ পৰা ভয় ভাবুকি দেখুৱাই নিবলৈ আহিছিল যুৱকৰ দলটোৱে । আনকি ছেলিমউদ্দিনে শহুৰেক আৰজ আলীক গুলীয়াই মৰাৰ ভাবুকিও দিছিল । দীৰ্ঘদিনে ছেলিমউদ্দিনে পত্নীৰ ওপৰত নিৰ্যাতন চলাই অহাৰ বাবে যোৱা কেইদিনমান ধৰি নিৰ্যাতিতা পত্নীয়ে দুই সন্তানক লগত লৈ পিতৃৰ ঘৰত আছিল ।