নিয়মীয়া বাৰ্তা, ২২ জানুৱাৰীঃ চমকপ্রদ প্রদর্শনেৰে খেলো ইণ্ডিয়া য়ুথ গেমছৰ ফাইনেলত প্রৱেশ কৰা অসমৰ ১৭ বছৰ অনূর্ধ্ব ল’ৰাৰ ফুটবল দলটো ৰূপৰ পদকতে সন্তুষ্ট থাকিবলগীয়া হ’ল৷
সৰুসজাই এথলেটিক ষ্টেডিয়ামত কালি অনুষ্ঠিত ১৭ বছৰ অনূর্ধ্ব ল’ৰাৰ ফুটবলৰ ফাইনেলত ঘৰুৱা দল অসমক ১–০ গ’লৰ ব্যৱধানত পৰাস্ত কৰি চুবুৰীয়া ৰাজ্য মিজোৰামে সোণৰ পদক জয় কৰিবলৈ সক্ষম হয়৷
মিজোৰামৰ হৈ নির্ণায়ক গ’লটো কৰে এম লালপেকলুংগাই৷ তেওঁ ৩৭ মিনিটত অসমৰ ৰক্ষণ বিভাগৰ বেহু ভেদ কৰি গ’লটো কৰে৷
উল্লেখ্য যে অসমৰ ১৭ বছৰ অনূর্ধ্ব ল’ৰাৰ দলটোৰ সমান্তৰালকৈ ২১ বছৰ অনূর্ধ্ব ল’ৰা আৰু ছোৱালীৰ দল দুটায়ো চলিত খেলো ইণ্ডিয়া য়ুথ গেমছত সুন্দৰ প্রদর্শন দাঙি ধৰিবলৈ সক্ষম হৈছে৷
কালি ল’ৰাৰ দলটোৱে শক্তিশালী মহাৰাষ্ট্রক হৰুৱাই ফাইনেলত স্থান নিশ্চিত কৰে৷ অৱশ্যে ছোৱালীৰ দলটো ছেমিফাইনেলত পৰাজয়ৰ সন্মুখীন হয়৷ কাইলৈ সৰুসজাই ষ্টেডিয়ামত ২১ বছৰ অনূর্ধ্ব অসমৰ ল’ৰাৰ দলটোৱে পঞ্জাবৰ বিৰুদ্ধে ফুটবলৰ ফাইনেল খেলিব৷