নিয়মীয়া বাৰ্তা, ২৮ জানুৱাৰীঃ সদ্ভাৱনা প্ৰকল্পৰ শুভাৰম্ভ কৰাৰ প্ৰাকমুহূৰ্তত আজি শ্ৰীমন্ত শংকৰদেৱ কলাক্ষেত্ৰত মুখ্যমন্ত্ৰী ড॰ হিমন্ত বিশ্ব শৰ্মাই অসম সচিবালয়ৰ কৰ্মচাৰীসকলৰ সৈতে মত-বিনিময় কৰে৷ জনসাধাৰণমুখী তথা সু-ব্যৱস্থাৰ অংশ হিচাপে অহা ৰ ফেব্ৰুৱাৰীৰ পৰা শুভাৰম্ভ কৰিবলগীয়া সদ্ভাৱনা প্ৰকল্পৰ বিষয়ে হোৱা মত-বিনিময় অনুষ্ঠানত ভাষণ প্ৰদান কৰি মুখ্যমন্ত্ৰীয়ে কয় যে নাগৰিককেন্দ্ৰিক সেৱাসমূহ সৰ্বতোপ্ৰকাৰে সফল কৰাৰ দিশত অসম সচিবালয়ৰ কৰ্মচাৰীসকলৰ গুৰুত্বপূৰ্ণ অৰিহণা আছে৷ জনসাধাৰণৰ বহু বছৰ ধৰি মীমাংসা নোহোৱা ফাইলসমূহ ৰাজ্য চৰকাৰে সূচনা কৰিব বিচৰা এই প্ৰকল্পৰ জৰিয়তে সুনিৰ্দিষ্ট সময়ৰ ভিতৰত নিষ্পত্তি কৰিব বিচৰা হৈছে৷
মুখ্যমন্ত্ৰীয়ে কয় যে ৰাজ্য চৰকাৰে এই প্ৰকল্প সঠিকভাৱে ৰূপায়ন কৰাৰ দিশত বিষয়া-কৰ্মচাৰীসকলক জড়িত কৰিব বিচাৰিছে৷ নাগৰিকসকল প্ৰশাসন ব্যৱস্থাটোৰ অন্যতম অংশীদাৰ বুলি উল্লেখ কৰি মুখ্যমন্ত্ৰীয়ে কয় যে প্ৰতিটো ফাইল নিষ্পত্তিকৰণৰ দিশত সংবেদনশীলতা থাকিব লাগিব৷ মুখ্যমন্ত্ৰীয়ে কয় যে সচিবালয় হৈছে সমগ্ৰ ৰাজ্যৰ প্ৰশাসন ব্যৱস্থাটোৰ প্ৰাণকেন্দ্ৰ৷ সেইবাবে অসম সচিবালয়ৰ ফাইল নিষ্পত্তিকৰণৰ ব্যৱস্থাটো নিকা, দ্ৰুত আৰু পেছাদাৰীত্ব মনোভাৱেৰে কৰিব লাগিব৷ তেওঁ লগতে কয় যে ৰাজ্য চৰকাৰে ২০২৩ চনৰ ১০ মে’ৰ ভিতৰত অসম সচিবালয়ত থকা সকলো ফাইল নিষ্পত্তি কৰিব৷ এই সময়ছোৱাৰ ভিতৰত ই-ফাইল ব্যৱস্থাটো কাৰ্যকৰী কৰা হ’ব বুলিও তেওঁ কয়৷ সদ্ভাৱনা প্ৰকল্পৰ লগতে জনতা ভৱনত স্বচ্ছতা অভিযানো আৰম্ভ কৰা হ’ব৷
স্বচ্ছতা জীৱনৰ অংগ আৰু এক দৰ্শন বুলি উল্লেখ কৰি মুখ্যমন্ত্ৰীয়ে প্ৰতিটো বিভাগতে স্বচ্ছতা সুনিশ্চিত কৰাৰ দিশত বিষয়া-কৰ্মচাৰীসকলে আত্মনিয়োগ কৰিব লাগিব বুলিও কয়৷ মিছন বসুন্ধৰাৰ কথা উল্লেখ কৰি মুখ্যমন্ত্ৰীয়ে কয় যে জ্জ্ব লাখ জনসাধাৰণে তেওঁলোকৰ ভূমিৰ সমস্যা নিষ্পত্তিকৰাৰ বাবে আবেদন জনাইছে৷ ইতিমধ্যে ২ লাখ এনেধৰণৰ আবেদন নিষ্পত্তি কৰা হৈছে৷ অহা ১০ মে’ৰ ভিতৰত আৰু ৬ লাখ আবেদন নিষ্পত্তি কৰা হ’ব বুলিও তেওঁ কয়৷ মুখ্যমন্ত্ৰীয়ে কয় যে সদ্ভাৱনা প্ৰকল্পৰ মূল উদ্দেশ্যই হ’ল এক সঁহাৰিপূৰ্ণ প্ৰশাসন ব্যৱস্থা গঢ়ি তোলা আৰু জনসাধাৰণলৈ সহায়ৰ হাত আগবঢ়োৱা৷ সেয়েহে প্ৰতিগৰাকী কৰ্মচাৰীয়ে জনসাধাৰণৰ স্বাৰ্থত এই প্ৰকল্প ৰূপায়নৰ দিশত নিষ্ঠা সহকাৰে সহযোগিতা আগবঢ়াব লাগিব বুলিও মুখ্যমন্ত্ৰীয়ে কয়৷
উল্লেখ্য যে আজিৰ এই অনুষ্ঠানত কেইবাগৰাকী উচ্ছপদস্থ বিষয়াই অংশগ্ৰহণ কৰে৷