নিয়মীয়া বাৰ্তা ২৭ আগষ্টঃ জি এছ টিৰ নামত ভুৱা ৰচিদেৰে প্রায় ১৮০ কোটি টকাৰ কেলেংকাৰি সংঘটিত কৰা গুৱাহাটীৰ এজন ব্যৱসায়ীক গ্রেপ্তাৰ কৰিছে জি এছ টি ইণ্টেলিজেন্সৰ গুৱাহাটী মণ্ডলে৷ ভুৱা ৰচিদেৰে কোটি কোটি টকা আত্মসাৎ কৰি গ্রেপ্তাৰ হোৱা ব্যৱসায়ীজন হৈছে বিকাশ বাঞ্চাল৷ এদিন পূর্বে গ্রেপ্তাৰ কৰা বাঞ্চালক কামৰূপ মহানগৰ জিলাৰ মুখ্য ন্যায়িক দণ্ডাধীশৰ আদালতত হাজিৰ কৰোৱা হৈছিল৷ আদালতে বাঞ্চালক ১৪ দিনৰ বাবে ন্যায়িক জিম্মালৈ প্রেৰণ কৰিছে৷
এক বিবৃতিত গুৱাহাটী মণ্ডলৰ অতিৰিক্ত সঞ্চালক এইচ এম এনালে প্রকাশ কৰা অনুসৰি ভুৱা ৰচিদৰ জৰিয়তে কয়লা পৰিবহণৰ নামত কোটি কোটি টকা আত্মসাৎ কৰি আহিছিল ব্যৱসায়ী বাঞ্চালে৷ মেছার্ছ বাঞ্চাল এছ’চিয়েটছৰ স্বত্বাধিকাৰী বিকাশ বাঞ্চালে লুধিয়ানা, গুজৰাটৰ গান্ধীধাম, হাৰিয়ানাৰ কালকা আৰু গুৱাহাটীৰ বিভিন্ন স্থানৰ পৰা ভুৱা প্রতিষ্ঠানৰ জৰিয়তে এই ধন আত্মসাৎ কৰি আহিছিল৷ চিমেণ্ট উৎপাদন, ক’ক উৎপাদন আৰু অন্যান্য সামগ্রী উৎপাদনৰ নামত বাঞ্চালে এই ভুৱা ৰচিদসমূহ প্রদান কৰি আহিছিল৷ প্রকৃতার্থত কোনো ধৰণৰ সামগ্রী পৰিবহণ নকৰাকৈয়ে এই ভুৱা ৰচিদসমূহ প্রদান কৰি ধন আত্মসাৎ কৰি আহিছে৷
উল্লেখ্য যে ইয়াৰ পূর্বেও এনেধৰণে ধন আত্মসাৎ কৰা ফাঁচীবজাৰৰ দুজন ব্যৱসায়ীক জি এছ টি ইণ্টেলিজেন্সে গ্রেপ্তাৰ কৰিছিল৷