নিয়মীয়া বাৰ্তা ১৬ মাৰ্চঃ চাকৰি নিয়মীয়াকৰণৰ ক্ষেত্রত শাসনাধিষ্ঠিত চৰকাৰখনে কৰি থকা বঞ্চনাৰ প্রতিবাদত অহা ১৮ মার্চৰ পৰা অনির্দিষ্টকালীন কর্মবিৰতি ঘোষণা কৰিছে ৰাজ্যৰ গৃহৰক্ষীসকলে৷ ১৮ মার্চৰ পুৱা ৬ বজাৰ পৰা ৰাজ্যৰ ২৭ হাজাৰ গৃহৰক্ষীয়ে অসহযোগিতা পালনেৰে এই কার্যসূচী ৰূপায়ণ কৰিব৷ আজি গুৱাহাটী প্রেছ ক্লাবত এখন সংবাদ মেলত এই কথা ঘোষণা কৰে সদৌ অসম প্রশিক্ষণপ্রাপ্ত গৃহৰক্ষী সন্থা আৰু সদৌ অসম গৃহৰক্ষী স্বেচ্ছাসেৱক কল্যাণ সন্থাই৷ সংবাদ মেলত প্রশিক্ষণপ্রাপ্ত গৃহৰক্ষী সন্থাৰ সভাপতি কামাখ্যা দাসে কয় যে বিগত সময়ছোৱাত বিভিন্ন সময়ত গৃহৰক্ষী জোৱানসকলে প্রতিবাদী কার্যসূচী ৰূপায়ণ কৰি আহিছে৷ এই প্রসংগত মুখ্যমন্ত্রী সর্বানন্দ সোণোৱালক সাক্ষাতো কৰা হৈছিল৷ তেওঁলোকে গৃহৰক্ষীসকলৰ সমস্যা সমাধানৰ প্রতিশ্রুতি দিছিল৷ কিন্তু এই প্রতিশ্রুতি আজিপর্যন্ত কার্যকৰী নকৰিলে বুলি উল্লেখ কৰি তেওঁ কয়– ‘যোৱা ৫ মার্চত অসমৰ গৃহ বিভাগৰ পৰা সন্থাক আলোচনাৰ বাবে মতা হৈছিল৷ কিন্তু কোনো কাৰণ নোহোৱাকৈ এদিন পূর্বে এই বৈঠকখন বাতিল কৰা হয়৷ চৰকাৰ তথা গৃহ বিভাগৰ এই ল’ৰা–ধেমালিক আমি তীব্র ভাষাৰে গৰিহণা দিছোঁ৷
গৃহৰক্ষী বাহিনীত কর্তব্যৰত প্রত্যেকজন সদস্যই নিজৰ প্রাপ্যৰ দাবীত জাগ্রত হৈছে৷ অসম চৰকাৰৰ প্রতাৰণা আৰু প্রৱঞ্চনা কোনো কাৰণতে মানি লোৱা নহ’ব৷’ ইফালে কর্মবিৰতি কার্যসূচীৰ লগতে আগন্তুক বিধানসভা নির্বাচনত তেওঁলোকে কোনোধৰণৰ কর্তব্য পালন নকৰে বুলিও আজি স্পষ্ট কৰি দিয়ে৷ এই প্রসংগত দাসে কয়– ‘বিগত সময়ছোৱাত নির্বাচনৰ সময়ত কর্তব্যত নিয়োজিত হৈ থকা বাবে নিজৰ ভোটাধিকাৰ আমি সাব্যস্ত কৰিব পৰা নাছিলোঁ৷ কিন্তু এইবাৰ আমি নির্বাচনৰ কর্তব্য পালন নকৰোঁ৷ ইয়াৰ পৰিৱর্তে আমি ভোটদানৰ জৰিয়তে আমাক কৰা বঞ্চনাৰ প্রতিশোধ ল’ম৷ পৰিয়ালসহ এইবাৰ আমি নির্ণায়ক ভোট প্রদান কৰিম৷’ উল্লেখ্য যে গৃহৰক্ষীসকলে দীর্ঘদিনৰ পৰা তেওঁলোকৰ চাকৰি নিয়মীয়াকৰণৰ লগতে সম–কামৰ সম–মজুৰি আদায়ৰ বাবে দাবী উত্থাপন কৰি আহিছে৷ তদুপৰি গৃহৰক্ষীসকলক অনলাইনৰ জৰিয়তে নিয়োগ কৰা কার্যৰো বিৰোধিতা কৰি আহিছে তেওঁলোকে৷ ইপিনে সংবাদ মেলত দাসে কয় যে এটা বিয়াগোম গৃহ বিভাগ থাকোঁতে আজি গৃহৰক্ষীসকলৰ দুর্দশাৰ সীমা নোহোৱা হৈছে৷ ক’ভিডৰ কালছোৱাত গৃহৰক্ষীসকলে দায়িত্ব পালন কৰিছে৷ কর্তব্যৰত অৱস্থাত ক’ভিডত আক্রান্ত হৈ দুজন গৃহৰক্ষী জোৱানে মৃত্যুবৰণ কৰিছে৷ কিন্তু তেওঁলোকৰ পৰিয়ালে কোনো সাহায্য লাভ নকৰিলে৷