পাঁচ বছৰত অসমত ৩১.২৬ লাখ ভোটাৰ বৃদ্ধি

নিয়মীয়া বাৰ্তা ২৬ জানুৱাৰীঃ বিধানসভা নির্বাচনক লৈ আৰম্ভ হোৱা ব্যাপক তৎপৰতাৰ মাজতে ৰাজনৈতিক দলসমূহৰ এইবাৰ লক্ষ্য হৈ পৰিছে ৰাজ্যৰ যুৱ ভোটাৰসকল৷ প্রায় প্রতিটো ৰাজনৈতিক দলে এইবাৰ যুৱ ভোটাৰক লক্ষ্য কৰি আৰম্ভ কৰিছে নির্বাচনী কুচকাৱাজ৷ শাসকীয় বিজেপিৰ লগতে প্রধান বিৰোধী দল কংগ্রেছ তথা নতুনকৈ গঠন হোৱা অসম জাতীয় পৰিষদ  আৰু ৰাইজৰ দলেও যুৱ ভোটাৰক আগত লৈয়ে বিধানসভা নির্বাচনৰ বাবে প্রস্তুত কৰি তুলিছে ৰণকৌশল৷ উল্লেখ্য যে শেহতীয়াকৈ প্রকাশ পোৱা ভোটাৰ তালিকাত এইবাৰ ১৮ বছৰ বয়সৰ পৰা ৩০ বছৰ বয়সৰ ভিতৰত আছে সর্বাধিক ভোটাৰ৷ অর্থাৎ ১৮ বছৰ বয়সৰ পৰা ৩০ বছৰ বয়সৰ প্রায় ৬৯ লাখ ভোটাৰে এইবাৰ নির্ণয় কৰিব প্রার্থীৰ ভাগ্য৷ মুখ্যতঃ ইয়াকে লৈ যুৱ ভোটাৰক আকর্ষিত কৰাৰ লক্ষ্য কৰি লৈছে ৰাজনৈতিক দলসমূহে৷ যোৱা ১৮ জানুৱাৰীত প্রকাশ পোৱা ৰাজ্যৰ চূড়ান্ত ভোটাৰ তালিকা অনুসৰি ২০ বছৰ বয়সৰ পৰা ২৯ বছৰ বয়সলৈ এইবাৰ ভোটাৰ তালিকাত স্থান পাইছে ৬৪,২৯,৩৭৮গৰাকী ভোটাৰে৷ ইয়াৰে ৩২,৩২,৭৯৫গৰাকী পুৰুষ ভোটাৰ আৰু ৩১,৯৬,৫৮৩গৰাকী মহিলা ভোটাৰ৷ আনহাতে, ১৮ বছৰৰ পৰা ১৯ বছৰ বয়সৰ ভিতৰত প্রথমবাৰৰ বাবে ভোটাধিকাৰ পোৱা ভোটাৰৰ সংখ্যা হ’ল ৪,২০,৭৯২গৰাকী৷ ইয়াৰে ২,৩৬,৮৯৩গৰাকী পুৰুষ ভোটাৰ আৰু ১,৮৩,৮৮৯গৰাকী মহিলা ভোটাৰ৷ ২০১৬ চনৰ বিধানসভা নির্বাচনতকৈ ১৫ শতাংশতকৈ অধিক যুৱ ভোটাৰৰ বৃদ্ধিয়ে স্বাভাৱিকতে ৰাজনৈতিক দলসমূহৰ বাবে সৃষ্টি কৰিছে প্রত্যাহ্বান৷ সেয়েহে যুৱ ভোটাৰক লক্ষ্য কৰি শাসকীয় বিজেপিৰ লগতে কংগ্রেছ, অগপ, অসম জাতীয় পৰিষদ আদি দলসমূহেও আৰম্ভ কৰিছে বিশেষ পৰিকল্পনা৷ যুৱ ভোটাৰক আকর্ষিত কৰাৰ লক্ষ্যৰে বিজেপিয়ে প্রতিটো সমষ্টিৰ প্রতিটো বুথতে অধিকসংখ্যক যুৱ সদস্যক দায়িত্ব অর্পণ কৰাৰ লগতে পৃষ্ঠপ্রমুখ তথা অন্যান্য দায়িত্ব অর্পণ কৰিছে যুৱ সদস্যৰ ওপৰত৷ আনকি শাসকীয় দলটোৱে এইবাৰ নির্বাচনত অধিকসংখ্যক যুৱ প্রার্থীক প্রার্থিত্ব দিয়াৰ প্রস্তুতি চলাইছে৷

উজনি অসমৰ প্রায়কেইটা সমষ্টিতে যুৱ ভোটাৰক লক্ষ্য কৰি বিজেপিয়ে নতুন মুখ প্রক্ষেপৰো চলাইছে কুচকাৱাজ৷ আনহাতে, কংগ্রেছে যুৱ ভোটাৰক আকর্ষণ কৰাৰ লক্ষ্যৰে শেহতীয়াকৈ কেইবাটাও কার্যসূচী গ্রহণ কৰাৰ লগতে নির্বাচনত যুৱ প্রার্থীক অগ্রাধিকাৰ দিয়াৰো পৰিকল্পনা কৰিছে৷ লক্ষণীয়ভাৱে শেহতীয়াকৈ প্রকাশ পোৱা ভোটাৰ তালিকাক ৩০ বছৰ বয়সৰ পৰা ৩৯ বছৰ বয়সৰ ভোটাৰ সংখ্যা হ’ল ৫৬,৬৯,৮৮০জন৷ ইয়াৰে ২৮,৩৯,৭৪৯জন পুৰুষ ভোটাৰ আৰু ২৮,৩০,১৩১গৰাকী মহিলা ভোটাৰ৷ একেদৰে ৪০ বছৰ বয়সৰ পৰা ৪৯ বছৰ বয়সৰ ভিতৰত ভোটাৰ আছে ৪৫,১২,০৬৫জন৷ ইয়াৰে ২২,৫৩,৮৫৮গৰাকী পুৰুষ ভোটাৰ আৰু ২২,৫৮,২০৭গৰাকী মহিলা ভোটাৰ৷ ভোটাৰ তালিকাত ৫০ বছৰৰ পৰা ৫৯ বছৰৰ ভোটাৰৰ সংখ্যা হ’ল ৩১,৭৪,৭৫২গৰাকী৷ ইয়াৰে ১৬,৫৭,৬৫৮গৰাকী পুৰুষ আৰু ১৫,১৭,০৯৪গৰাকী মহিলা৷ ৬০–৬৯ বছৰৰ বয়সৰ মুঠ ভোটাৰৰ সংখ্যা হ’ল ১৭,৩৫,২৪১গৰাকী৷ আনহাতে, ৭০ৰ পৰা ৮৯ বছৰৰ ভিতৰত মুঠ ভোটাৰৰ সংখ্যা হ’ল ৭,৫৬,৬৮৪গৰাকী৷ মন কৰিবলগীয়া যে যোৱা ১৮ জানুৱাৰীত প্রকাশ পোৱা ভোটাৰ তালিকা অনুসৰি এইবাৰ মুঠ ভোটাৰৰ সংখ্যা হ’ল– ২ কোটি ২৯ লাখ ৯২ হাজাৰ ৫০৫গৰাকী৷ ইয়াৰে ১ কোটি ১৬ লাখ ৫৬ হাজাৰ ৯২৬গৰাকী পুৰুষ আৰু ১ কোটি ১৩ লাখ ৩৫ হাজাৰ ৫৭৯গৰাকী মহিলা ভোটাৰ৷ ২০১৬ চনত মুঠ ভোটাৰৰ সংখ্যা আছিল ১ কোটি ৯৮ লাখ ৬৪ হাজাৰ ৪৯৬গৰাকী৷ যোৱা পাঁচ বছৰত ৰাজ্যত মুঠ ভোটাৰ বৃদ্ধি পালে ৩১ লাখ ২৮ হাজাৰ ৯গৰাকী৷ ইয়াৰে ১ কোটি ১৬ লাখ ৫৬ হাজাৰ ৯২৬গৰাকী পুৰুষ ভোটাৰ আৰু ১ কোটি ১৩ লাখ ৩৫ হাজাৰ ৫৭৯গৰাকী মহিলা ভোটাৰ৷ লক্ষণীয়ভাৱে বিগত ৫ বছৰত বৃদ্ধি পোৱা এই ভোটাৰৰ অধিকাংশ ভোটাৰ হ’ল– নগাঁও, বৰপেটা, ধুবুৰী, কাছাৰ, কৰিমগঞ্জ, দৰং, কামৰূপ আৰু কামৰূপ (মহানগৰ) জিলাৰ৷ নগাঁও জিলাত যোৱা পাঁচ বছৰত বৃদ্ধি হোৱা ভোটাৰৰ সংখ্যা হ’ল– ১,৮০,২৯৬গৰাকী৷ একেদৰে বৰপেটা জিলাত ১,৮৪,৫০৩গৰাকী, কৰিমগঞ্জত ১,৩৫,৭৯৬গৰাকী, কাছাৰ জিলাত ১ লাখ ৬০ হাজাৰ আৰু কামৰূপৰ গ্রাম্য, মহানগৰ জিলাত বৃদ্ধি হোৱা মুঠ ভোটাৰৰ সংখ্যা হ’ল ২ লাখ ৯০ হাজাৰ৷ প্রকাশ পোৱা ভোটাৰ তালিকা অনুসৰি ৰাজ্যৰ ১২৬টা বিধানসভা সমষ্টিৰ ভিতৰত ৰাজধানী দিছপুৰ সমষ্টিত আছে সর্বাধিক ভোটাৰ৷ দিছপুৰ সমষ্টিত মুঠ ভোটাৰৰ সংখ্যা হ’ল ৪,০৬,৫৫৫গৰাকী৷ আনহাতে, সর্বাধিক কম থকা সমষ্টিটো হ’ল শিৱসাগৰ জিলাৰ থাওৰা সমষ্টি৷ এই সমষ্টিটোত মুঠ ভোটাৰৰ সংখ্যা হ’ল ১,১৪,২২১গৰাকী৷