নিয়মীয়া বাৰ্তা, ১৩ ছেপ্টেম্বৰঃ সদৌ অসম ছাত্র সন্থা আৰু অসম জাতীয়তাবাদী যুৱ–ছাত্র পৰিষদৰ উদ্যোগত জন্মলাভ কৰিবলগীয়া ৰাজনৈতিক দলত আৰম্ভ হ’ল প্রার্থিত্বকেন্দ্রিক কুচকাৱাজ৷ প্রস্তাৱিত দলটোৰ আহ্বায়ক সমিতি গঠন হোৱাৰ পিছতে শনিবাৰে সদৌ অসম ছাত্র সন্থা ত্যাগ কৰিছে দুগৰাকী জ্যেষ্ঠ বিষয়ববীয়াই৷ আছুৰ উপ–সভাপতি চিত্ত বসুমতাৰী আৰু মুখ্য সাংগঠনিক সম্পাদক ৰাজু ফুকনে কালি পুৱাই জাতীয় সংগঠনটোৰ দায়িত্বৰ পৰা অব্যাহতি লোৱাৰ কথা ঘোষণা কৰিছে৷ দুয়োগৰাকী নেতাই আছু, যুৱ–ছাত্র পৰিষদৰ উদ্যোগত গঠন হ’বলগীয়া নতুন দলটোৰ পৰা নির্বাচনত প্রতিদ্বন্দ্বিতা কৰাটো একপ্রকাৰ নিশ্চিত৷
উল্লেখ্য যে আছুৰ উপ–সভাপতি চিত্ত বসুমতাৰী ধেমাজি জিলাৰ এক পৰিচিত নাম৷ বৃহৎ নদীবান্ধবিৰোধী আন্দোলনৰ পৰা আৰম্ভ কৰি শেহতীয়া ‘কা’ আন্দোলনলৈ আছুৱে গ্রহণ কৰা প্রতিটো কার্যসূচীতে তেওঁ সন্মুখৰ পৰা নেতৃত্ব প্রদান কৰি আহিছে৷ বিগত প্রায় ২০ বছৰ ধৰি সদৌ অসম ছাত্র সন্থাৰ লগত জড়িত ধেমাজি জিলা ছাত্র সন্থাৰ প্রাক্তন সভাপতি চিত্ত বসুমতাৰীৰ একাণপতীয়া চেষ্টাতে শেহতীয়াকৈ জোনাইত সফলতাৰে অনুষ্ঠিত হৈছিল আছুৰ সাধাৰণ অধিৱেশনখন৷ কিন্তু জনগাঁথনিগত কাৰণত চিত্ত বসুমতাৰীয়ে নির্বাচনত প্রতিদ্বন্দ্বিতাৰ বাবে বাছি লৈছে ধেমাজি সমষ্টি৷ য’ত বর্তমানৰ বিধায়ক হ’ল বিজেপিৰ ডাঃ ৰণোজ পেগু৷ যদিও ধেমাজিত মিচিং জনজাতিৰ ভোটাৰে নির্ণায়ক ভূমিকা লৈ আহিছে, সমষ্টিটোত আধিপত্য আছে সোণোৱাল আৰু আহোম ভোটাৰৰ৷ এনে পৰিস্থিতিত ডাঃ ৰণোজ পেগুৰ দৰে শক্তিশালী প্রতিদ্বন্দ্বীৰ সন্মুখত ৰাজনীতিৰ পথাৰত নতুনকৈ খোজ দিবলৈ লোৱা চিত্ত বসুমতাৰীয়ে কিমানদূৰ প্রত্যাহ্বানৰ সৃষ্টি কৰিব পাৰে, সেয়া সময় আগবঢ়াৰ লগে লগেহে স্পষ্ট হৈ পৰিব৷ কিন্তু শেহতীয়াকৈ মিচিংসকলৰ ৰাজনৈতিক দল গণশক্তি আৰু শাসকীয় দল বিজেপিৰ মাজত আৰম্ভ হোৱা মুকলি সংঘাতে বসুমতাৰীক উপকৃত কৰিব পাৰে বুলি পর্যবেক্ষকসকলে ধাৰণা কৰিছে৷
আছুৰ মজিয়া ত্যাগ কৰাৰ সময়ত চিত্ত বসুমতাৰীয়ে মন্তব্য কৰে– ‘অসম প্রথম আছিল, অসম প্রথম হৈ আছে আৰু অসম চিৰদিন–চিৰকাল প্রথম হৈ থাকিব৷’ ইফালে, আজিৰ দিনটোতে আছু ত্যাগ কৰিছে সংগঠনটোৰ মুখ্য সাংগঠনিক সম্পাদক ৰাজু ফুকনে৷ বিগত ২৭ বছৰ ধৰি তেওঁ ছাত্র সংগঠনটোৰ লগত জড়িত হৈ আছে৷ ধনশিৰি মহকুমা ছাত্র সন্থাৰ পৰা আৰম্ভ কৰি সদৌ গোলাঘাট জিলা ছাত্র সন্থাৰ দীর্ঘদিন ধৰি নেতৃত্ব বহন কৰি অহা ৰাজু ফুকন বিগত দুধনৈ অধিৱেশনত মুখ্য সাংগঠনিক সম্পাদক হিচাপে নির্বাচিত হৈছিল৷ সমাগত ২০২১ চনৰ বিধানসভা নির্বাচনত সৰুপথাৰ সমষ্টিৰ পৰা প্রতিদ্বন্দ্বিতা আগবঢ়োৱাৰ লক্ষ্যৰে আজি তেওঁ আছু ত্যাগ কৰে৷ সৰুপথাৰৰ বর্তমান বিধায়িকা হ’ল ৰ’জলিনা তির্কী৷ বিগত নির্বাচনত কংগ্রেছ দলৰ প্রার্থী হিচাপে জয়লাভ কৰিছিল৷ সৰুপথাৰত চাহ জনগোষ্ঠীৰ ভোটাৰে সাধাৰণতে নির্ণায়ক ভূমিকা লয় যদিও আহোম আৰু চুতীয়া জনগোষ্ঠীৰ ভোটৰ বিভাজনৰ ফলতহে সেয়া সহজ আৰু সম্ভৱ হৈ উঠে৷ এইবাৰ নির্বাচনৰ পূর্বে ৰ’জলিনা তির্কীয়ে বিজেপিত যোগদান কৰিব বুলিও ব্যাপক চর্চা চলি আছে৷ এনে সম্ভাব্য নির্বাচনী প্রেক্ষাপটৰ সুযোগ–সুবিধা ৰাজু ফুকনে কিদৰে আদায় কৰিব পাৰে, সেয়াও আজিৰ দিনটোত স্পষ্ট হৈ উঠা নাই৷ আজিৰ দিনটোত আছু ত্যাগ কৰা চিত্ত বসুমতাৰী আৰু ৰাজু ফুকন– দুয়োগৰাকী নেতাই আছুৰ সাধাৰণ সম্পাদক লুৰিণজ্যোতি গগৈৰ ঘনিষ্ঠ হিচাপে পৰিচিত৷ সদ্যহতে পদত্যাগী নেতাদ্বয়ে নতুন দলটোৰ আহ্বায়কৰ দায়িত্ব ল’ব৷
একেদৰে অসম জাতীয়তাবাদী যুৱ–ছাত্র পৰিষদৰ উপ–সভাপতি দীপক হাজৰিকায়ো সংগঠন ত্যাগ কৰিছে৷ তেওঁ বোকাখাত সমষ্টিত নতুন দলটোৰ প্রার্থী হোৱাৰ সম্ভাৱনা আছে৷ নতুন আঞ্চলিক দলত প্রার্থিত্বকেন্দ্রিক কুচকাৱাজ আৰম্ভ কৰাৰ মাজতে অখিল গগৈৰ ‘এখন পতাকা, এটা প্রতীক, এটা দল’ৰ আহ্বান নস্যাৎ কৰিছে আছুৰ সাধাৰণ সম্পাদক লুৰিণজ্যোতি গগৈয়ে৷ কালি ‘নিউজ লাইভ’ৰ এক অনুষ্ঠানত অংশ লৈ আছুৰ সাধাৰণ সম্পাদকগৰাকীয়ে কয় যে এগৰাকী ব্যক্তিয়ে এটা সূত্র বা এটা ধাৰণা জাপি দিব বিচৰাটো গণতান্ত্রিক পৰম্পৰা নহয়৷ কাৰণ, বহু জনগোষ্ঠীয় বা নৃগোষ্ঠীয় সংগঠনৰ নিজা নিজা ৰাজনৈতিক দল আছে৷ আজি তেওঁলোকে ক্ষমতাৰ স্বার্থত চৰকাৰৰ লগত আছে যদিও কাইলৈ পৰিস্থিতি সলনি হ’ব পাৰে৷ তেতিয়া আমি তেওঁলোককো আহ্বান জনাব লাগিব৷ কিন্তু আমাৰ লক্ষ্য একেটাই হ’ব লাগিব, তাৰ বাবে সকলো ঐক্যবদ্ধ হ’ব লাগিব৷ কেনেকৈ ঐক্যবদ্ধ হোৱা যাব, সেই সিদ্ধান্ত ৰাজনৈতিকভাৱে হ’ব৷